ekran платформа за слободоумни
Студиите направени врз пациенти со ковид покажаа дека нашиот имунолошки систем различно реагира на оваа болест од вообичаеното. Сега, научниците се на трага да решат една од најголемите мистерии што го придружуваат коронавирусот – зошто некои луѓе минуваат само со поблаги симптоми, додека други буквално се борат за своите животи.
Се покажа дека имунолошкиот систем на некои пациенти реагира прилично невообичаено, така што кога одредени молекули и клетки не можат да се борат со вирусот, телото ги вклучува сите одбранбени механизми кои му се на располагање. И таа неконтролирана реакција може да ги оштети здравите ткива, пишува Њујорк Тајмс.
„Видовме неколку многу чудни работи во различни фази на инфекција“, вели Акико Ивасаки, имунолог од универзитетот Јеил и автор на неодамнешната студија.
Што се однесува до другите вообичаени вируси, како што е грипот, кога ќе влезе во нашето тело, имунолошкиот систем реагира со тоа што директно ќе го пронајде натрапникот и ќе го нападне, со што ќе купи време за телото правилно да реагира. Овој прв одговор зависи од молекулите наречени цитокини, кои се формираат како одговор на вирус. Овие микро-аларми потоа им даваат начин на антитела и Т-клетки кои се насочени кон вирусот и клетките што ги нападнал.
Како и да е, овој метод се чини дека паѓа во вода кај лица со ковид 19. Имено, цитокините во некои случаи не престануваат, по првото предупредување, да го алармираат организмот, дури и кога на местото на настанот пристигнуваат антитела и Т-клетки. Ова значи дека почетната реакција, односно воспалението поради инфекција, не запира дури и кога веќе не е потребно.
„Нормално е воспалението да се појави со вирусна инфекција. Но, проблемот е кога не можете да го решите “, вели Кетрин Блис, виролог од универзитетот Стенфорд.
И можеби заради таквата необична реакција кај некои пациенти, болеста трае подолго бидејќи вирусот е во состојба да го измами нашиот имунолошки одговор. Потоа, заради тој аларм, кој не запира, нашето тело реагира посилно и истовремено се напаѓа себе.
„Тоа е енигма. Имате силен одговор на имунолошкиот систем а вирусот сепак се размножува“, рекол Ејвери Август, имунолог од универзитетот Корнел.
