Кинотеката во склоп на мајската програма ќе прикаже и ретроспектива на кратки македонски филмови на режисерите Кочо Недков, Дарко Марковиќ и Елеонора Венинова, новиот документарен филм на Игор Иванов – „Време на бетон“. Исто така и „Буре барут“ на Дејан Дуковски во режија на Горан Паскаљевиќ, како и документарецот „Скопје 63“ на Вељко Булајиќ.
Филмот БУРЕ БАРУТ е во режија на познатиот југословенски и српски режисер Горан Паскаљевиќ. Сценариото за филмот е адаптација на драмскиот текст на авторот Дејан Дуковски, кој од 1995 година е поставен на сцената на Југословенскиот Драмски Театар.
Филмот на Паскаљевиќ е добитник на повеќе награди и признанија меѓу кои се издвојуваат ФИПРЕСЦИ наградите на Европските филмски награди и на Венецискиот филмски фестивал, како и Бронзената Камера 300 на Интернационалниот фестивал на филмската камера „Браќа Манаки“.
Проекцијата започнува во 20:00 часот.
На менито на Кинотека месецов се наоѓа и промоцијата на новиот филм потпишан од францускиот кинопровокатор Франсоа Озон – „Петер фон Кант“. Се работи за еден интересен, постмодерен осврт и своевиден римејк на делата потпишани и креирани од легендата на германскиот нов бран, Рајнер Вернер Фасбиндер.