(ВИДЕО) По рекордната суша во Шпанија, се појавило селото на духови

Селото Ацередо во северозападна Шпанија „испливало“ по големата суша која речиси го испразнила резервоарот на шпанско-португалската граница, привлекувајќи толпи туристи со своите морничави, сиви урнатини.
Со резеревоар на 15. проценти од нејзиниот капацитет, уште еднаш се откриваат детали за животот што бил „замрзнат“ во 1992. година, кога селото Ацередо во северозападниот шпански регион Галиција било потопено за да се создаде акумулацијата Алто Линдосо.
„Тоа е како да гледате филм. Се чувствувам тажно“, рекол 65-годишниот пензионер Максимино Перез Ромеро од Коруња.
Шетајќи низ калливата земја испукана од сушата на некои места, посетителите пронашле делумно срушени покриви, тули и дрвени урнатини кои некогаш формирале врати или греди, па дури и фонтана со вода што сè уште истекува од ‘рѓосаните цевки.
До некогашното кафуле биле наредени гајби со празни пивски шишиња, а до камениот ѕид бил паркиран уништен и рѓосан стар автомобил. Снимките од дрон прикажуваат напуштени згради.

Марија дел Кармен Јанез, градоначалничка на Советот на Лобиос, чиј дел е Ацередо, причината за ваквата состојба ја нашла во недостатокот на врнежи во последните месеци, особено во јануари, но и во „прилично агресивната експлоатација“ на португалската компанија EDP, која управува со резервоарот.
На 1. февруари, португалската влада наредила шест брани, вклучувајќи го и Алто Линдосо, практично да ја прекинат употребата на водата за производство на електрична енергија и наводнување, поради големата суша.
Прашањата за одржливоста на акумулациите не се нови. Минатата година, неколку шпански села се пожалиле на тоа дека електроиндустријата ги користи по брзото повлекување од езерото Ибердрола во западна Шпанија. Компанијата соопштила дека ги следи правилата.
Податоците од Министерството за животна средина покажуваат дека акумулациите во Шпанија се со 44. отсто од нивниот капацитет, многу под просекот од околу 61. отсто во последната деценија, но сепак над нивоата регистрирани во сушата во 2018. година. Извор од министерството рекол дека навестувањата за суша покажуваат потенцијално влошување во наредните недели, но сè уште не откриле општ проблем низ целата земја.

Фото: Принтскрин/YouTube