ekran платформа за слободоумни
Денес во „Спомен домот на браќа Миладиновци“ во Струга со почеток од 19.30 часот почнува циклусот литературни настани посветен на литературата и издаваштвото. Честа е голема, што токму романот Излегувањето од сенка (тајното женско училиште) каде авторката Дијана Петрова се занимава/„ја запишува“ женската верзија на (и)сториите кои се ткаат околу ликот и делото на Миладинови, е првиот настан од овој циклус. Промотор на романот е Мерсиха Исмајлоска.
Романот на Дијана Петрова „Излегувањето од сенка (тајното женско училиште)“ доаѓа како мелем за сите оние нешта што останале премолчени или недокажани, а се врзани околу дејноста на браќата Миладиновци.
Струшката промоција токму во домот на Миладиновци е начин да се покаже дека тоа е препознаено, како и да прати порака до сите намерници кои Миладиновци ги упатило кон Струга и Македонија, да ја прочитаат и оваа книга.
Дијана Петрова е родена 8.4.1992 во Делчево. Дипломирала на Филолошкиот факултет „Блаже Конески“ во Скопје, на Катедрата за македонска книжевност и јужнословени книжевности. Досега ги објавила романот „Бдеењето над себе“ и збирката раскази „Не правете им сенка на гробовите“. „Излегувањето од сенка (Тајното женско училиште)“ е нејзина трета објавена книга.
