„Во ниту еден момент не помислив да го напуштам мојот син, тоа би било навистина нехумано. Со сопругата наскоро се разделивме, и започнав нов живот како самохран татко на ‘сончево’ дете“, вели тој
Евгениј Анисимов (33) од Русија не можел да замисли да го остави своето дете во сиропиталиште како што сугерирала неговата сопруга. Малиот Миша е роден со Даунов синдром, а неговата мајка не можела да се справи со тоа и ги напуштила. Евгениј решил да го одгледа момчето сам.
Овој млад татко решил да ја сподели својата приказна со јавноста за да му покаже на светот колку се прекрасни децата со оваа дијагноза, но и да ги мотивира другите родители никогаш да не се предаваат туку да соберат храброст и да се соочат со предизвиците, особено кога нивните деца се во прашање.
Децата со Даунов синдром имаат прекрасна, весела и оптимистичка личност, поради што се нарекуваат и деца на Сонцето. Ако пораснат во здраво и среќно семејство, ги имаат сите шанси за нормален живот. Евгениј смета дека образованието е исклучително важно затоа што незнаењето доведува до страв и предрасуди, но исто така и до драстични потези на неговата сега веќе поранешна сопруга кога таа ги напуштила.
„Моментот на среќа по неговото раѓање траеше точно една минута и 39. секунди кога докторот ни рече: ‘Се плашам дека вашето бебе има Даунов синдром’. Не знаев што да направам, но чувствував дека мојата задача во тој момент беше да ги исклучам емоциите и да ја поддржувам сопругата затоа што верував дека ќе и биде тешко“, се присетил тој и додал дека чекале потврда за дијагнозата неколку дена.
Колку и да одбрал да биде силен, емоциите го совладале. Излегол од болницата и плачел.
„Не плачев долго време, но подоцна тие солзи ме посрамотија. Во мојот живот, на крајот на краиштата, ништо не се смени. Сè се случи како што планиравме, се роди мојот син“, продолжил тој.
Истата вечер, тој седнал покрај компјутерот и научил многу за оваа дијагноза и децата кои имаат Даунов синдром.
„Не знаев ништо за дијагнозата на мојот син. Се сетив само на ужасната фотографија од еден советски учебник по биологија. Влегов на Интернет и истражував. Дознав за Евелина Бледанс и нејзиниот Семјон, кој е роден во исто породилно одделение со Мишка. Научив дека во Европа, луѓето со Даунов синдром добро се социјализирани, можат да живеат и да работат самостојно“, вели овој храбар татко.