ЗОИ 2018. во Пјонгчанг и ЛОИ 2020. во Токио ексклузивно на Македонската Телевизија

Македонската Радио Телевизија со гордост информира дека на нејзините програми ексклузивно ќе ги емитува настаните од 23-те Зимски Олимписки игри во Пјонгчанг, коишто ќе се одржат од 9 до 25 февруари оваа година.
„По долги и исцрпувачки преговори со Дискавери, официјалниот носител на правата за Олимписките игри на територијата на Европа во периодот 2018-2024, Јавниот сервис успешно ја круниса важната мисија – да ја продолжи полувековната традиција, според којашто спектакуларните манифестации се меѓу главните препознатливи белези на неговата богата спортска програма. Договорот со којшто МРТ обезбеди дека ќе ги пренесува и Олимписките Летни игри во Токио во 2020 година, е склучен на само три дена пред почетокот на Игрите во Пјонгчанг, пред се поради цената на телевизиските права, далеку повисока во однос на цената од претходните олимпијади. Сепак, Македонската Радио Телевизија вложи максимални напори и успеа да издејствува поволни услови, врз основа на коишто ќе остане главниот промотор на олимпизмот и на олимпиското движење во земјава“, соопштуваат од јавниот сервис.
Од 9. до 25. февруари, на МТВ-1 и на МТВ-2, гледачите ќе можат да уживаат во околу 150. часа ексклузивна премиерна програма од најатрактивните случувања на снежните терени во Пјонгчанг. Во периодот од 2. часот изутрина до 15.30 часот попладне, директни преноси ќе одат од натпреварите во алпско скијање, хокеј на мраз, уметничко лизгање, скијачки скокови, бијатлон и во нордиско скијање.
Поради временската разлика со Кореја од осум часа, дел од возбудувањата во боб, санкање, брзо лизгање, акробатско скијање и во сноуборд ќе бидат емитувани одложно во попладневните и во вечерните часови, па заедно со репризите, Јавниот сервис ќе понуди повеќе од 200. часа ексклузивнa олимпискa содржинa.
Олимписките Зимски игри во Пјонгчанг ќе бидат вистински програмски темел во текот на шеснаесетте дена, но МРТ нема да ги заборави ниту вообичаените спортски настани. Во редовните термини ќе бидат емитувани и преносите од фудбалската Лига на шампионите и од Лига Европа, од ракометната Лига на шампионите во двете конкуренции, од ракометната СЕХА лига, како и од завршниот турнир на кошаркарскиот Куп на Македонија.