ekran платформа за слободоумни
Кралицата Елизабета не е во добра состојба
Принцот Чарлс, Камила и принцот Вилијам отпатувале во Балморал за да бидат со кралицата Елизабета, која е под медицински надзор откако лекарите се загрижиле за нејзиното здравје, а утринава и националниот сервис ја прекинал програмата во живо за да соопшти за лошата здравствена состојба на Елизабета Втора.
Портпаролот на Бакингемската палата рекол дека кралицата била советувана да остане под медицински надзор:
– По дополнителниот преглед утринава, лекарите на кралицата се загрижени за здравјето на нејзиното височество и препорачаа таа да остане под медицински надзор – изјавил портпаролот, пренесуваат британските медиуми.
После тоа, Кенсингтонската палата потврдила дека двајцата престолонаследници се на пат кон резиденцијата на кралицата.
Принцот Чарлс и Камила веќе отпатувале во Балморал, а наскоро ќе им се придружи и принцот Вилијам.
Принцот Хари и Меган Маркл исто така отпатувале во Шкотска за да бидат со кралицата Елизабета.
Принцот Хари и Меган Маркл, кои пред два дена беа во Британија, а потоа отпатуваа за Германија, се враќаат да бидат со кралицата и остатокот од семејството поради големата грижа за нејзиното здравје, јавуваат британските медиуми.
Веста за нивното враќање во Британија ја потврди и портпаролот на двојката.
