ekran платформа за слободоумни
САЈЕД САДАТ бил министер за комуникации во авганистанската влада пред да се пресели во Германија минатиот септември во потрага по подобра иднина. Сега е доставувач во Лајпциг.
Тој признава дека некои негови блиски луѓе го критикувале дека земал таква работа откако работел во владата две години. Но, за него, вели тој, работата е работа. Тој поднел оставка на функцијата министер во 2018. година.
„Немам за што да се чувствувам виновен“, рекол 49-годишникот, стоејќи во портокалова униформа покрај велосипед, пренесува Ројтерс.
„Се надевам дека и другите политичари ќе го следат истиот пат, ќе работат со јавноста и нема само да се кријат“, заклучил тој. Неговата приказна стана особено истакната по хаосот што се создаде во Авганистан по преземањето на Талибанците.
Неговото семејство и пријателите исто така сакаат да ја напуштат земјата. Тие се надеваат дека ќе им се придружат на илјадници други на летовите за евакуација или ќе се обидат да најдат други правци.
Садат се борел да најде работа во Германија што ќе одговара на неговото претходно искуство. Со дипломи за информатика и телекомуникации, Садаа се надевал дека ќе најде работа во сродна област. Но, без познавање на германскиот, вели тој, неговите шанси биле мали.
„Јазикот е најважниот дел“, вели Садат, кој има и британско државјанство. Учи германски четири часа секој ден во училиштето за јазици, а потоа започнува шестчасовна смена со доставување оброци.
„Првите денови беа возбудливи, но тешки“, рекол тој, опишувајќи го предизвикот да научиш да возиш велосипед во градскиот сообраќај.
„Колку повеќе излегувате и колку повеќе среќавате луѓе, толку повеќе учите“, рекол тој.
