Европската агенција за лекови (ЕМА) денес објави дека ги разгледува извештаите за ретко нервно нарушување кај луѓето кои примиле вакцина АстраЗенека и побарала подетални информации од компанијата, пренесуваат медиумите.
Како дел од редовниот преглед на извештаите за безбедноста на вакцините, Комитетот за безбедност на Европската агенција за лекови ги анализирал податоците за случаи на Гилајн-Баре синдром, објави ЕМА.
ЕМА ги истражува и извештаите за воспаление на срцето по Фајзер/Бионтек и Модерна, се вели во соопштението. Двете вакцини користат нова mRNA технологија.
Американскиот центар за контрола и превенција на болести (CDC) минатата недела објави дека не открива поврзаност помеѓу воспалението на срцевиот мускул и вакцината за ковид-19.
ЕМА и другите регулатори претходно ја испитуваа можноста за формирање на згрутчување на крвта по вакцинацијата против корона.
Што е Гилајн-Баре синдром ?
Гијлен-Баре синдромот е ретка невролошка состојба во која имунитетниот систем на организмот го напаѓа заштитниот слој на нервните влакна. Синдромот најчесто се јавува со бактериска или вирусна инфекција и се развива во период од неколку денови или недели.
Овој синдром е исклучително редок, а неговата појава е поврзана со респираторни и цревни инфекции, како и со некои вакцини користени во минатото.
Оваа состојба беше поврзана со вакцинации во минатото – најмногу со кампањата за вакцинација за време на епидемијата на свински грип во САД во 1976. година и децении подоцна со вакцината употребена за време на пандемијата на грип Х1Н1 во 2009. година.
АстраЗенека, Фајзер, Бионтек и Модерна сè уште не ја коментирале објавата на ЕМА.
Фото: Instagram