ekran платформа за слободоумни
Денес во Театарот за деца и младинци во Скопје, со почеток во 19:00 часот, најмладата публика ќе може да ја погледне куклената претстава насловена „Дванаесетте месеци“.
Станува збор за добро познатата Словачка народна приказна, која е драматизирана од страна на режисерот Петар Пашов. Многу добро познатиот мотив, во кој Маќеата и нејзината ќерка Галениче неправедно го тероризираат Девојчето Сираче, режисерот низ огромна доза на хумор го поставува на сцената во која куклите го имаат главниот збор. Дванаесетте месеци се сожалуваат над судбината на Сирачето и со помош на своите натприродни моќи му помагаат да се избори за својата правда. Тројцата актери, Ана Левајковиќ-Бошков, Катарина Илиевска-Силјановска и Драган Довлев, се чувствува дека уживаат додека ја играат претставата и во дејствието активно ги вклучуваат и децата.
Нема да биде претерано ако се каже дека оваа претстава можеби најмногу ги смее и расположува помалите деца и не случајно таа за многу деца е најомилената наша претстава. За да се уверите во ова најтопло Ви ја препорачуваме ДВАНАЕСЕТТЕ МЕСЕЦИ, зашто шансите да не Ви се допадне се многу мали.
Режија и текст: Петар Пашов
Играат: Ана Левајковиќ Бошков, Драган Довлев, Катарина Илиевска Силјановска.
Билетите можете да ги набавите онлјан на www.puppet.com.mk
