ekran платформа за слободоумни
Во интимниот амбиент на „Кафе Литература“ („Дајмонд мол“), овој петок (19.04), со почеток во 21 часот, публиката ќе ужива во авторска музика, мешавина на рок и џез, на нашиот се-лектор Џијан, со текстови од Славко Јаневски и Тина Иванова.
Групата „Шлиц“, која ја предводи нашиот музички феномен Џијан Емин, ќе ја видиме во една поинаква светлина со сосема нов, автентичен и уникатен проект преку изведба на мешавина од арт рок и џез од мултимедијалниот проект „Диши љубов“, по текст на Тина Иванова, и сценско-музичкиот перформанс „Улица“ создаден на текст од Славко Јаневски.
„Диши љубов“ пее за љубовта, за Скопје, зборува за две суштински појави без кои човекот не би можел да опстои – воздухот и љубовта. Музиката и лириката ја поседуваат онаа скопска, носталгична звучна естетика и влече корени од музиката од осумдесеттите и особено од музиката од деведесеттите години на минатиот век создавана на американското и на британското музичко поднебје.
Настапуваат:
Џијан Емин – гитара и вокал
Драган Гиновски-Гино – гитара
Георги Шарески – гитара
Дарко Мучев-Мучо – бас-гитара
Гоце Стевковски – тапани
„Литература.мк“, во партнерство со радиото „Џез ФМ“, организираат низа музички настани, кои се одржуваат секој петок во „Кафе Литература“ во „Дајмонд мол“. Целта на овие концерти е на публиката да ѝ се овозможи квалитетно музичко искуство и да се поддржи развитокот на џез-културата.
