Во петок се затвора мултимедијалниот фестивал „Преспаленд“

Како за крај на ова незаборавно мултимедијално доживување, во петок ( 17.09) ќе има низа настани со кои ќе се одбележи крајот на првото издание на фестивалот „Преспаленд“.

Со почеток во 10:00, во чест на народниот борец и поет Димитар Мите Богоевски, во истоименото училиште во Ресен ќе биде отворен мурал посветен на неговиот лик и дело.

Од 17:00, во Домот на културата во Ресен ќе биде отворена ликовната изложба „Преспа во срцето“- Кирил Јоновски најголемиот познавачач и хроничар на Преспа.

Во 19:00 на амфитеатарот во Ресен ќе настапи Toka Shitet. Зад ова уметничко име е Идриз Амети, фронтменот на групата „Бла Бла Бла“. Како соло уметник свири на традиционалниот балкански инструмент шаркија. По него со почеток од 20:00, концерт ќе имаат Игор Џамбазов и Гуру Харе.

Се гледаме на Преспаленд 2021

Напомена: Фестивалот ќе биде одржан според актуелните здравствени протоколи за одржување на настани на отворено.