Близнаците од Канада за својот прв роденден го добија своето место во Гинисовата книга на рекорди. Адиа и Адриал Надараџа се прогласени за најрано родени близнаци на светот, откако пристигнаа на 4 март 2022 година, 126 дена пред предвидениот термин.
Братот и сестрата ја презедоа титулата од американските близнаци Кили и Кембри Еолдт, кои се родени 125 дена предвреме во 2018 година.
Мајката на близнаците Шакина Рајендрам се породила во 21 недела и петти ден, а лекарите и рекле дека бебињата немаат шанси да преживеат.
„Тие беа речиси оставени да умрат. Бевме во шок“, изјавила Рејендрам за Гинисовата книга на рекорди.
Типична бременост трае околу 40 недели и некои болници нема да спасат бебиња родени пред 24-та или 26-та недела. Рајендрам потоа била префрлена во друга болница која била подготвена да обезбеди грижа за бебињата родени во 22-та недела.
Близнаците биле примени во болницата Маунт Синај во Торонто, каде се соочиле со компликации од мозочно крварење и сепса.
„Многу пати мислевме дека ќе ги изгубиме“, додала Рејендрам.
Адриал претрпе перфорација на дебелото црево, што довело до инфекција на крвта и тешко воспаление. За среќа, по пет месеци поминати во болница, близнаците закрепнале и биле пуштени на домашна нега. И двајцата сè уште се под надзор на различни експерти, но имаат голем напредок.
Фото: Принтскрин/YouTube/Guinness World Records