ekran платформа за слободоумни
Дарија Андовска е родена во Скопје на 2 јануари 1979 година. Таа е композиторка, пијанистка и авторка на оркестарска, камерна, солистичка, вокална музика, музика за филм, театар и танц, како и на мултимедијални проекти. Нејзините дела се изведувани на бројни домашни и светски фестивали, почнувајќи од Македонија, Бугарија, Србија, Црна Гора, Босна и Херцеговина, Хрватска, Словенија, Швајцарија, Италија, Германија, Грузија, Франција, Белгија, Англија, Ирска, Данска, Шведска, Норвешка, Украина, Азербејџан, Австрија, Албанија, Русија, Мексико, Канада, Полска, Романија, Ерменија, Турција, САД, а наградувана е како една од важните млади композитори во Европа и од Балканот.
Од 2010 година Дарија Андовска работи како Доцент по група теоретски предмети со композиција, диригирање и музикологија на Факултетот за музичка уметност- Скопје, Универзитет Св. Кирил и Методиј, како и на Факултетот за драмски уметности по предметот Применета музика. Во периодот од 2001 до 2010 година работи на истиот факултет како асистентка по предметите Музички форми, Хармонска анализа, Полифонија и Основи на музичкото дело. Работела и како музичка новинарка и продуцентка во Македонската Радиотелевизија и како авторка на сценарија, композиторка и ко-режисерка. Во 2003 година била ангажирана како музичка менаџерка, PR-асистентка и музичка асистентка за потребите на фестивалот 17. Dresdner Tage der zeitgenössischen Musik, Германија.
Редакцијата на Екран и го честита роденденот на Дарија и и посакува многу здравје и успеси.
