Во хотелите во кои привремено се сместени пациенти со лесни симптоми на КОВИД-19, градските власти во Токио воведуваат употреба на робот што ќе им помогне на пациентите да го подобрат моралот, да им помогнат во одржување на хигиената и да го спречат ширењето на инфекции кај хотелскиот персонал.
Така, два вида роботи произведени од „Softbenk Robotics“ ќе „стапат на должност“ во пет хотели кои во моментот имаат заболени со корона вирус, а има план наскоро да има по еден робот на секој кат на ваквите хотели.
Еден тип на уред е полухуманоиден робот кој е во состојба да говори пораки, додека другиот е еден вид автономна правосмукалка, според Си-Ен-Ен.
Животот во карантин во таков хотел е прилично осамен, па пациентите дури и пријавувањето го вршат самостојно.
Тие поголемиот дел од времето го поминуваат во своите простории, а во хотелското лоби – „црвената зона“ со најголем ризик од зараза – тие се спуштаат само три пати на ден во одредени периоди, за да ги земат своите оброци.
Ситуацијата треба, барем до одреден степен, да ја ублажи полу-хуманоиден робот, кој ги поздравува пациентите и ги потсетува да ја проверат нивната телесна температура, а покрај тоа повторува фрази како што се: „Обединети во борбата против корона вирусот“.
„Се надевам дека роботот ќе може да ги расположи пациентите и да го направи нивниот престој во хотелот што е можно поудобно“, рекол еден официјален претставник на Токио, додавајќи дека присуството на роботот во лобито исто така ќе го заштити персоналот од заразување со корона вирусот.