ekran платформа за слободоумни
Техничкиот премиер Оливер Спасовски денеска се сретна со авторите на филмот „Медена земја“, Тамара Котевска и Љубомир Стефанов, продуцентот и монтажер Атанас Георгиев и кинематографот Самир Љума и уште еднаш им честиташе за значајниот успех.
„Ви благодарам што нé направивте горди со освоените награди и номинациите. Вашите успеси се големи и ние како Влада донесовме повеќе заклучоци во однос на изразување признание за успесите и нивната реализација“, рече Спасовски.
На членовите на екипата на „Медена земја“ им соопштиле дека се планираат проекции на филмот за сите средни училишта и универзитети во земјата, а тие, пак, заблагодарувајќи се ги изразиле своите ставови во однос на подобрување на условите на филмската кинематографија во нашата земја, давајќи предлози за поуспешно претставување на нашите филмови и фестивали на меѓународната сцена. Тие споменале дека дел од успехот е и на кинематографот Фејми Даут, кој заради службени обврски е отсутен.
Техничкиот премиер Спасовски на членовите на тимот им додели плакета како знак за признание за историскиот успех, а тие нему му пренесоа поздрави и тегла мед од производството на пчеларката Хатиџе Муратова еден од главните ликови на документарецот „Медена земја“.
