ekran платформа за слободоумни
Тврдини, замоци, музеи, цркви, џамии и други историски и културни објекти и знаменитости беа уништени за време на земјотресот што вчера го погоди јужниот дел на Турција и северозападна Сирија и кој однесе над пет илјади човечки животи, според моментално достапните информации.
Замокот Газиантеп, историска локација што ја користеа Римјаните и туристичка атракција во југоисточна Турција, е тешко оштетен и урнат од земјотресот. „Некои од бастионите на замокот Газиантеп во централната област Шахинбеј се целосно уништени, а остатоците се расфрлани на патот“, објавила турската државна новинска агенција Анадолу.
Цитаделата во Алепо
Неколку сириски археолошки локалитети, меѓу кои и познатата, античка тврдина во градот Алепо, беа оштетени во земјотресот. „Се урнаа делови од отоманската воденица, додека делови од североисточните одбранбени ѕидови пукнаа и се урнаа“, се вели во соопштението на сириската Генерална дирекција за антиквитети и музеи. Тие додадоа дека паднале делови од куполата на минарето на џамијата Ајубид во цитаделата.
Нова џамија
Историската џамија Јени Чами во Малатја, која вообичаено се нарекува Нова џамија бидејќи беше обновена и пуштена во употреба минатата година, исто така делумно се урна во земјотресот. Таа не била новоизградена, била изградена помеѓу 1597 и 1663 година.
Латинска католичка црква во Искендерун
Како последица на земјотресот беше урната и латинската католичка црква во Искендерун во Турција. Сејит Торун од Републиканската народна партија (ЦХП) во ТВ програма изјави дека многу јавни згради во Хатај, вклучувајќи ја и зградата на АФАД, се урнале.
Фото: Facebook
