Кога ќе ја слушнете неговата музика едноставно не можете да не продолжите да го следите неговиот опус. Јовче Пандев е едноставен млад човек кој со својата музика допира до секој – дал по текстовите, дал по музиката, или одличната продукција – едноставно ако сакате квалитетна музика мора да го слушате, бидејќи, во име и на вистината – има и што да се слушне. И’, токму тоа е една од причините што е поканет да учествува на „Дојран Рок Фест 2022“ а ние да го направиме ова интервју…
– Дали за Јовче Пандев може да кажеме дека е конзистентен во својата посветеност на рокенролот?
Вистинската вредност на некаква конзистентност е да останете лојални на музика која не е културолошки деструктивна врз генерациите во развој. Се друго е избор или околности. Труд или среќа. А лично мојата конзистентност кон некаков правец или жанр е развој и еволуира. Што е добро.
– Во една изјава велиш „по кичот треба да пукаме со квалитет“ – имаме ли доволно оружје за таква акција?
Ако секој од нас искрено и чесно, трдољубиво и посвестено работи на тоа, ќе имаме. Ако секој од нас ја освести својата општествена и духовно-морална одговорност, нема како да немаме.
– Неспорно е дека не бегаш од својот музички стил и никому не се додворуваш. Директен си, конкретен во се што го работиш, и ако бидеме искрени – одлично го работиш (од приложеното на ЈуТјуб)?
Ете. Фала ви од срце. Ова го разбирам како препознавање на трудот. Одиме понатаму. Нема компромиси.