ekran платформа за слободоумни
Силно невреме утрово го погодило Задар, Хрватска. Како што јавуваат локалните
медиуми, градот е во хаос, некои училишта ја откажале наставата, а делови од
градот се без струја. Поплавени се патишта и подруми.
“Центарот на цивилната заштита на Град Задар, донесе одлука да ја одложи наставата во попладневната смена во сите основни и средни училишта на подрачјето на градот Задар. Исто така, сите училишта се обврзани да обезбедат дежурства на професори, кои ќе ги прифатат децата во случај некои од нив сепак да дојдат на настава”, објавено е на веб страната на Град Задар.
Министерот за здравство, Милан Кујунџиќ, потврдил дека обилните дождови денес наутро поплавиле делови од задарската болница. Кујунџиќ на новинарите им кажал дека голем број на простории во болницата се поплавени, па е договорено, доколку е потребно, итните пациенти да се пренесуваат и згрижуваат во Госпиќ и Шибеник.
“Поплавата е сериозна, голем број простории во болницата за жал се поплавени”, рекол Кујунџиќ додавајќи дека во константен контакт со управникот на задарската болница, која ќе посети во текот на денот.
Обилните дождови во Задар поплавиле куќи и подруми, а од Метеоролошката станица Задар известиле дека од 8 до 10 наутро паднале околу 190 литри дожд по метар квадратен, што е повеќе од двојно од просечните месечни врнежи од 98 литри.
