ВЕНЕЦИЈА: „Златен лав“ за американскиот филм „Nomadland”

Режисерката Клое Зао не дојде на доделувањето на наградите во Венеција, а наградата во нејзино име ја прими директорот на „Дизни“
Завесата на 77. Филмски фестивал во Венеција е повлечена, а меѓу 18. достигнувања во трката за „Златен лав“ победи филмот „Nomadland”на режисерката Клое Зао.
Режисерката Клое Зао не дојде на доделувањето на наградите во Венеција, а наградата во нејзино име ја прими директорот на „Дизни“ за Италија, Давид Романо.
Во конкуренција за „Златен лав“, покрај филмот „Nomadland“, беа и филмовите: “Quo Vadis, Aida“, “The World to Come”, “Le Sorelle Macaluso”, “Nuevo Orden”, “Amants”, “Laila in Haifa”, “Dorogie Tovarischi!”, “Spy No Tsuma”, “Khorshid”, “Pieces of a Woman”, “Miss Marx”, “Padrenostro”, “Notturno” , “Sniegu Juz Nigby Nie Bedzie”, “The Disciple”, “Und Morgen die Ganze Welt” и “In Between Dying”.
Најдобриот филм го избра жирито во состав: актерката Кејт Бланшет за претседател, режисерите Вероника Франц, Џоана Хог и Кристијан Пецолд, американскиот актер Мат Дилон, француската актерка Лудивин Сагние и италијанскиот писател Никола Лагиоја.
Заеднички впечаток на околу 6.000 филмаџии и новинари, кои поминаа низ годинашната Мостра, е дека „венецијанскиот експеримент“ успеа и дека најстариот филмски фестивал покажа дека филмската индустрија може да заживее и да функционира дури и во пандемија.
„Златниот лав“ минатата година го освои филмот „Џокер“ во режија на Тод Филипс со Хоакин Феникс во главната улога.