СЗО: „Корона вирусот може да се победи само вака!“

Пандемијата на коронавирус, за време на која се заразени повеќе од 16. милиони луѓе, е веројатно најлошата глобална здравствена криза со која се соочи Светската здравствена организација, оцени денес директорот на таа агенција на Обединетите нации, Тедрос Гебрејесус.
Тој на редовниот онлајн брифинг во Женева истакнал дека светот може да го победи вирусот само строго придржувајќи се на здравствените мерки, од носење маски до избегнување толпа.
„Онаму каде се почитуваат овие мерки, бројот на случаи се намалува а таму каде што тие не се почитуваат, бројот на случаи се зголемува“, рекол Тедрос Гебрејесус.

Тој ги издвоил Канада, Кина, Германија и Јужна Кореја како земји што добро ја контролираат ситуацијата откако коронавирусот повторно почна да се шири во различни делови на светот, дури и во оние каде што државите мислеа дека можат да ја контролираат инфекцијата.
Директорот на Програмата за управување со вонредни состојби на СЗО, Мајк Рајан, оценил дека потребата државите ширум светот да продолжат да одржуваат строги епидемиолошки ограничувања, како физичко растојание, е поважна од дефинирањето на вториот бран, нови врвови и локалните жаришта.
„Јасно е дека притисокот врз вирусот ги намалува бројките и дека олеснувањето на притисокот ги зголемува“, објаснил Рајан, признавајќи дека сепак е невозможно границите меѓу државите да останат затворени на неодредено време.