На денешен ден во 1995 година е родена англиската пејачка, текстописец и модел со албанско потекло, Дуа Липа. Нејзината музичка кариера започнала на 14-годишна возраст, кога таа почнала да препејува песни од нејзините омилени пејачки како Пинк и Нели Фуртадо на You Tube. Во 2015 година, таа потпишала со издавачката куќа Warner Music Group и набрзо потоа ја издала својата прва песна.
Нејзиниот прв студиски албум насловен „Dua Lipa“, бил издаден на 2 јуни 2017 година. Од албумот биле издадени седум песни, меѓу кои и песните „Be The One“ и „IDGAF“ кои се нашле во првите 10 на британската топ листа и песната „New Rules“, која се искачила на врвот на листата. Во 2018 година, Липа била наградена со две награди на доделувањето на Британските музички награди, и тоа за најдобра британска соло изведувачка и најдобра нова британска пејачка.
Вториот студиски албум насловен како „Future Nostalgia“ е објавен во 2020 година. И овој албум наишол на позитивни критики, а номиниран е за шест Греми награди, вклучувајќи ги наградите за албум, плоча и песна на годината, а станал и нејзин прв албум кој се нашол на врвот на листата во Велика Британија. Во 2021 година таа ја освоила наградата за најдобар женски изведувач и албум на годината на Британските музички награди.
Меѓу погоре споменатите награди Дуа Липа има и две МТВ европски музички награди, една МТВ видео музичка награда, две Билборд музички награди и една Американска музичка награда.
Интересен факт е дека во своја сопственост има два Гинисови рекорди и тоа, во 2020 година за најмногу продадени карти за livestream концерт за женски соло изведувач, и во 2021 година за најмногу преслушувања на Spotify во текот на еден месец, исто така за женски соло изведувач.