ekran платформа за слободоумни
ТРЕЈСИ Ворингтон од Велс по професија е медицинска сестра и вели дека тоа и помогнало навреме да препознае дека нешто не е во ред со нејзиното здравје. Имено, откако забележала необично вагинално крварење, а била во менопауза, веднаш побарала помош од лекарите, кои и дијагностицирале рак на ендометриумот, пренесува The Sun.
„Во еден период од мојата кариера имав можност да работам со колешка која ми рече дека жените во менопауза никогаш не треба да крварат, без разлика колку малку, бидејќи крварењето е еден од најчестите симптоми на рак на матката или на јајниците“, рекла Трејси, на која и бил дијагностициран малигнен тумор на матката. Ракот на ендометриумот е најчестиот малиген раст во женскиот репродуктивен систем и четвртиот најчест карцином кај жените во светот.
Што е рак на ендометриумот и како да го препознаете?
Се јавува кога клетките во слузницата на матката почнуваат неконтролирано да се шират. Најчесто се јавува кај жени над 50 години, а освен крварење за време на менопаузата, често може да биде знак и обилно или неправилно крварење пред менопаузата. Ова е една од најчестите причини зошто многу жени не го сфаќаат сериозно овој проблем, мислејќи дека овие промени се предизвикани од перименопауза.
Покрај невообичаеното крварење, понекогаш може да се јави и лесно крварење или гноен исцедок од вагината, кој често е придружен со болки во стомакот и карлицата. Лекарите предупредуваат дека доколку забележите какво било неправилно или обилно крварење, особено околу или по менопаузата, веднаш треба да побарате лекарска помош бидејќи раната интервенција е клучот за закрепнување.
Трејси успеала, а нејзината операција вклучувала целосно отстранување на матката и јајниците, по што следела локализирана радиотерапија. Според The Sun, лекарите откриле дека слузницата на нејзината матка е речиси пет пати подебела отколку што би требало да биде.
„Со мојата приказна би сакала да ги предупредам сите жени да реагираат на секоја промена бидејќи тоа ми го спаси животот“, додала Трејси.
Фото: Архива
