Црвениот крст на Македонија по повод 75 години од своето основање пред пандемијата спроведе кампања за набавка на инкубатори за предвремено родени и болни бебиња каде амбасадор на кампањата беше сопругата на претседателот на Република Северна Македонија, г-ѓа Елизабета Ѓоргиевска.
Свечениот дел на настанот се одржа денес каде беа донирани два инкубатори за предвремено родени и болни бебиња сместени на Одделот за неонатологија, педијатрија и цистична фиброза на Универзитетската клиника за Детски болести во Скопје.
Г-ѓа Ѓоргиевска истакна дека грижата за предвремено родени болни бебиња треба да претставува исклучително важен приоритет и во таа смисла беше и желбата да се набави оваа опрема и на таков начин да се спасат што е можно поголем број на животи.
На настанот се обрати и Генералниот секретар на Црвениот крст, г-дин Саит Саити каде смета дека треба да бидеме токму тука, одбележувајќи го нашиот јубилеј преку предавање на оваа донација која ќе биде од голема корист и ќе помогне за подобрување на условите на Детската клиника.
Донацијата беше примена од страна на Директорката на Универзитетската клиника за Детски болести, г-ѓа Наташа Алуловска каде им се заблагодари за организирање на кампањата, која што покажа дека и во услови на криза има општествено одговорни чинители кои што сакаат да помогнат.