ekran платформа за слободоумни
Во синоќешната емисија на регионалниот музички натпревар „Ѕвездите на Гранд“ за прв пат настапи трансродова личност, која покрај пеењето што го покажа, имаше и посебна порака за „сите што се различни“.
Алино Јухарт од Словенија е првата трансродова личност која се појави во „Ѕвездите на Гранд“, а на публиката и се претстави со нумерите „Паметна и луда“ на Марија Шерифовиќ и „Лажу те“ во изведба на бендот Амадеус.
Јухарт призна дека би сакала да ја викаат Алина и дека е тука да ги охрабри „сите жени и сите оние кои се различни“.
„Мислам дека Србија и целиот регион треба само да запознаат жена како мене. Јас сум само нормална личност која сака да сака и да биде сакана и да биде среќна како и сите други. Сакам да ја инспирирам секоја личност да го живее својот живот и нивната животна вистина“, рекла таа.
Таа за Гранд онлајн зборувала и за предизвиците со кои се соочила како трансродова личност.
„Понекогаш дури и заборавам дека сум нешто поинакво. Едноставно, толку ја живеам својата женственост што понекогаш заборавам”, признала таа.
На прашањето дали е подготвена за критики, таа рекла дека е подготвена на се и дека „оди по светот и шири љубов“.
Фото: Принтскрин/Grand
