ekran платформа за слободоумни
На денешен ден во 2006 година, легендарниот компилациски албум Greatest Hits на Queen официјално беше прогласен за најпродаван и најпопуларен албум на сите времиња во Велика Британија, надминувајќи продажба од повеќе од 5,5 милиони копии, бројка која подоцна ќе порасне на над седум милиони.
„Greatest Hits“ беше издаден на 26 октомври 1981 година и претставува колекција на најголемите хитови на Queen од нивниот пробив со „Seven Seas of Rhye“ во 1974 година, па сè до „Flash“ од 1980 година. Интересно, албумот немал унифицирана листа на песни, туку содржината се менувала по земји, зависно од тоа кои синглови биле најуспешни таму. Во некои пазари бил вклучен и „Under Pressure“, нивната историска соработка со Дејвид Боуви.
Со глобални продажби од над 25 милиони примероци, „Greatest Hits“ е најпродаваниот албум на Queen и еден од најпродаваните на сите времиња. Во Британија помина четири недели на врвот и стана четврти најголем албум на 1980-тите. До 2006 година веќе беше најпродаван албум во историјата на земјата, а во следните години стана и првиот што надминал шест, па потоа и седум милиони продадени копии.
Албумот е вистински феномен и по долговечност: до ноември 2025 година има поминато неверојатни 1.179 недели на британската топ-листа, повеќе од кој било друг албум во историјата.
Иако првично имаше умерен успех во САД, албумот доживеа повторно подем со изданието Classic Queen (1992) и особено по успехот на филмот Bohemian Rhapsody во 2018 година. Највисоката позиција ја достигна дури во 2020 година, 39 години по издавањето кога се искачи на број 8 на Billboard 200, што е втор најбавен подем во историјата на американските топ-листи. До 2025 година има 672 недели поминато на Billboard 200 и статус на 9 пати платинест албум.
Од своето објавување, „Greatest Hits“ на Queen постојано преродува нови генерации обожаватели. Од винилот и касетите, преку CD-изданијата и дигиталната ера, па сè до стриминг-платформите, албумот останува како најјасен доказ за долготрајната моќ на музиката на Queen.
