ekran платформа за слободоумни
Започна последното одбројување до долгоочекуваниот Get EXITed спектакл, кој на 7 септември во преполниот струмички Градски парк ќе ги собере најголемите светски и регионални ѕвезди! Поп и соул сензацијата Џон Њуман, глобалниот хитмејкер Бурак Јетер, регионалните икони Констракта и „Ван Гог”, како и Џамбо Агушеви Оркестар, Лана и „Д Георс”, со себе носат хитови кои бројат повеќе од пет милијарди слушања на водечките стриминг платформи! Влезот на овој голем настан е бесплатен за сите посетители, а за сите кои сакаат да го доживеат настанот на највисоко ниво достапни се ВИП влезници по цена од 3.100 денари!
Најголемата забава за испраќање на летната сезона на настани во организација на тимот на ЕГЗИТ, следниот четврток пристигнува во струмичкиот Градски парк, а исчекувањето дополнително го зголемуваат глобалните хитови и жанровски шареноликата програма кои пристигнуваат со водечките светски и регионални имиња! Џон Њуман повеќе од деценија наназад суверено владее на светската музичка сцена и ги освојува срцата на фановите со моќниот глас, емотивните мелодии и песните кои се искачија на самиот врв на водечките топ листи, судбина која досега ја имаа дури девет негови синглови. Уште синглот „Feel The Love”, со кој во 2012 година се придружи на мегапопуларната група Рудиментал, наговестуваше дека зад оваа соработка се крие глобална музичка сензација во зародок. Денеска Џон Њуман стои зад соработките со лидерите на музичкиот свет и песните кои ги знае целиот свет, меѓу кои се „Blame” (feat. Calvin Harris), „Love Me Again”, „Cheating”, „If You Really Love Me” (feat. David Guetta), свежиот хит „Call Your Name” (feat. Alesso) и бројни други.
Исклучителниот турски продуцент, глобален хитмејкер и диџеј Бурак Јетер плени со својата музичка умешност, но и со атмосферата и енергијата кои ги креира каде и да се појави, што уште еднаш се потврди и со исклучителниот настап на овогодишниот ЕГЗИТ фестивал! Изминатата деценија песните „Friday Night”, „Oh My My”, „Crash”, „Happy” ги освојуваа планетата, радискиот етер и фестивалските сцени, додека омилената „Tuesday” заработи платинеста плакета во повеќе земји, а тој се потпишува и зад неоспорно најзапазениот ремикс на песната „My Life Is Going On”!
На големиот Get EXITed спектакл пристигнува и најбараната регионална музичарка Констракта, која со песната „In Corpore Sano” ги освои Европа и светот! Иако како вокалистка на групата „Земља Грува” веќе две децении е присутна на музичката сцена, Констракта се чини преку ноќ стана центар на внимание за регионалните медиуми, главна ѕвезда на социјалните мрежи, а бргу потоа и првиот домашен хедлајнер во историјата на ЕГЗИТ фестивалот! Публиката пред сѐ ја воодушеви со својот „Triptih”, а оваа година следуваше и ново тројно музичко уживање „Evo, obećavam”, кое ја потврди уникатноста на музичкиот и визуелниот израз на омилената регионална уметница!
Квалитетната гитарска страна на програмата ја предводат ветераните на регионалната рок сцена, групата „Ван Гог”, со кариера долга повеќе од три децении, 10 феноменални студиски албуми и две регионални ЕмТиВи награди зад себе, како и омилените, безвремени песни „Neko te ima”, „Ludo, luda”, „Skačem, skači”, „Za godine tvoje”, „Klatno”, „Anđele moj brate”, но и „Emotivno miniran” и другите од последното лонгплеј издание „More bez obala” од 2019 година.
На одличната регионална екипа ѝ се придружува и струмичкиот Џамбо Агушеви Оркестар, еден од најдобрите трубачки ансамбли од Балканот, како и исклучителните уметници од полето на електронската музика – новосадската продуцентка и диџејка Лана, една од најперспективните млади надежи на електронската сцена, и македонскиот мелодик-техно тандем „Д Георс”.
Второто струмичко Get EXITed издание кое ќе се одржува во четврток, на 7 септември ветува несекојдневно разновиден музички настан на кој сите се добродојдени – влезот е бесплатен, додека за посетителите кои ќе сакаат овој спектакл да го доживеат на специјално ниво во продажба се ВИП влезници по промотивна цена од 3.100 денари. Струмичкиот Get EXITed го организира тимот на ЕГЗИТ во соработка со општината Струмица.
