ekran платформа за слободоумни
Долгоочекуваното, второ по ред издание на „Get EXITed” настанот во Струмица, во организација на ЕГЗИТ тимот синоќа на посетителите во струмичкиот Градски парк им приреди спектакл за паметење! Повеќе од 20.000 фанови танцуваа до утро со омилените песни на поп и соул сензацијата Џон Њуман, кој со својот специјален настап покажа зошто важи за една од најголемите светски ѕвезди на денешницата, незаборавниот сет на глобалниот хитмејкер Бурак Јетер, регионалните мегаѕвезди Констракта и „Ван Гог”, но и одличниот Џамбо Агушеви Оркестар, вундеркиндот на електронската музичка сцена Лана и продуцентките и диџејки „Д Георс”!
„Во последните децении многумина работеа на тоа што повеќе да ги поделат луѓето и народите на овие простори, а токму ваквите средби го свртуваат тој процес во обратен правец, наместо омраза да имаме љубов, мир наместо војни, соработка и разбирање наместо кавги. Проектите како што е овој ја враќаат надежта и вербата дека подобра иднина, не само тука, туку и на целиот свет е можна, и тоа е суштината на нашата соработка со Струмица” – кажа основачот и директор на ЕГЗИТ фестивалот Душан Ковачевиќ.
На втората по ред „Get EXITed” забава, која ветува да стане нова, блескава традиција, присуствуваше и градоначалникот на Општина Струмица Костадин Костадинов, кој го истакна значењето на овој настан.
„Кога ќе дојдете на „Get EXITed” Струмица можете да ја почувствувате позитивната енергија која што е иницијална каписла и за мене и за Душан како основач на ЕГЗИТ фестивалот. Навистина чест и задоволство е да го имаме Get EXITed во Струмица втора година и со сигурен сум дека ќе го имаме и наредната и понаредната, и сѐ додека можеме да шириме позитивна енергија на Балканот тоа и ќе го правиме, бидејќи ваквите настани се нештата кои можат да нѐ обединат”, изјави градоначалникот на Општина Струмица, Костадин Костадинов.
Феноменалниот Џон Њуман синоќа ги воодушеви фановите со својот специјален хибриден настап, претставувајќи емотивни мелодии и танцувачки ритми во совршени размери, додека светски познатиот продуцент и диџеј со турско потекло Бурак Јетер со најголемите глобални хитови ја издигна енергијата до точка на вриење. Публиката уживаше и во еклектичната и жанровски шаренолика музичка програма која ја претставија омилената уметница во регионов Констракта со својот бенд „Земља Грува”, рок легендите „Ван Гог” со својата богата безвременска дискографија и еден од најдобрите трубачки ансамбли на Балканот Џамбо Агушеви Оркестар, додека одличниот електронски звук го комплетираа и донесоа првата потписничка за „EXIT Echosystem Music & Talent Office”, Лана и продуцентките и диџејки „Д Георс”.
Мисијата на ЕГЗИТ уште од самото оформување е поврзување на регионот и промоција на мирот, како и брендирање на дестинации и збогатување на културната понуда преку развојот на креативните индустрии и фестивалскиот туризам, а оваа летна журка за паметење донесе спектакл во преубавиот струмички Градски парк и воспостави статус на нова важна туристичка атракција на Балканот, која веќе втора година по ред ги пополнува сите сместувачки капацитети во Струмица и околината.
„Get EXITed” настанот е реализиран во организација со тимот на ЕГЗИТ и Општина Струмица.
(*Фотографии: EXIT Photo Team)
