ekran платформа за слободоумни
Синоќа во Филхармонија, Скопје, се одржа големиот концерт посветен на еден од најзначајните музички автори на овие простори, Влада Дивљан.
– Насловен „Само една љубов имам“, концертот го подготви групата „Невладина организација“ по повод десетгодишнината од смртта на Дивљан. Нивната турнеја со овој концерт симболично започна во Виена, со фантастична премиера во градот каде што Влада Дивљан живееше и твореше од 1999 година до крајот на животот, а по Белград и Загреб, сега пристигнува и во Скопје како дел од програмата на фестивалот „Таксират“ – известија претходно од „Пасворд продукција“.
Салата беше исполнета до последното место а имаше луѓе и кои стоеа – се со цел да ги видат и слушнат „Влада Дивљан – Невладина организација“
бенд од нови но и стари членови од првичниот состав на бендот „Идоли“, но и помлади кои ја сакаат и почитуваат музиката на Владе Дивљан.
Самиот почеток беше лесен, но и двосмерен – публиката веднаш ја почувствува енергијата на бендот и возврати. Во публиката лица од повеќе генерации – оние кои биле сведоци на уметноста која со музиката ја правеше Влада Дивљан со неговите „Идоли“, но и многу помлади генерации кои сите во ист ритам танцуваа со тактовите на музиката.
По неколку композиции на сцената се појави Констракта, која на нејзин начин, исполни неколку песни со бендот. Таа жена „јаде живи луѓе„ со својот глас – така ги нарекуваат оние со вонредни гласовни квалитети. Констракта уште повеќе ја „запали“ веќе возбудената публика која веќе беше на нозе. Да, во Филхармонија се стоеше и танцуваше.
„Влада Дивљан – Невладина организација“ потоа ја продолжи програмата во нивен стил и уште повеќе ја возбуди веќе „запалената“ публика која на своите места за седење танцуваше и пееше.
Како одминуваше концертот така се вжештуваше и атмосферата. Енергијата помеѓу изведувачите и присутните се разменуваше и одеше од песна во песна кон поголеми висини.
Е, потоа на сцената се појави Кирил Џајковски кој е уметник со препознатлив звук и изведе еден од своите електронски опуси, придружуван од бендот. И’, Џајковски го промени своето место и застана пред микрофонот:
„Со Влада соработувавме во Австралија, каде што и двајцата живеевме и соработувавме. Сега ќе ви изведеме една од тие соработки, а тоа е песна за филмот ‘Бал кан кан’ на Дарко Митрески“, рече едноставно Џајковски и се повлече на своето место. Музиката што започна потполно ги маѓепса присутните…кои пееја во ист глас со актерите на сцената…
Концертот продолжи со уште поголем интензитет, се пееше, танцуваше, играше, климаше со глава, секој на свој начин…
И’, тогаш на сцената се појави Логин Кочишки, организаторот на овој евент и човекот кој ни откри дека со Влада Дивљан имал посебна врска. За неговото искуство „како новинар“ и како Влада го „казнил“ со тоа да ја плати турата….
Бендот на Дивљан, „Невладина организација“ го предводат неговите долгогодишни пријатели и соработници Зденко Колар, Саша Шандоров, Борис Буњац, Марко Миливојевиќ и подмладокот Дамјан Дашиќ и Марко Чалиќ. Нивната најважна мисија е зачувување на големите хитови и безвременски песни на Владе Дивљан и повторно доживување на неговата музика заедно со публиката.
Македонската публика имаше можност да го чуе и види бендот кој работеше со единствениот уметник Влада Дивљан и заедно со нив да ги запее песните од неговиот богат опус и од сите периоди на неговата музичка кариера. Бендот ги изведе во живо најубавите песни од времето на „Идоли“, па преку соло делата, до „Олд старс“ бендот, „Невладина организација“ и „Лјетно кино“.
Влада Дивљан, пејач, композитор, гитарист, го основа еден од водечките бендови на новиот бран „ВИС Идоли“ во 1980 година. Тие ги објавија култните албуми „ВИС Идоли“, „Одбрана и последњи дани“, „Чокојада“ и „Шест дана јуна“. Има објавено уште 8 албуми за време на неговата самостојна кариера, но и со групите „Олд старс“, „Невладина организација“ и „Лјетно кино“. Со Срѓан Гојковиќ-Гиле создаваше музика за деца, а компонираше за телевизија, филм и театар. Од 1999 година живееше во Виена, каде што почина на 4 март 2015 година.
Фото: А.Ѓ.
Видео и текст: Г.О.
