Репертоар на Театар за деца и младинци од 22. до 24. март

22.03 (среда) – „Зрното грашок и принцезата“
Светски познатата бајка ПРИНЦЕЗАТА НА ЗРНО ГРАШОК, во текстот на бугарскиот драмски писател Атанас Илков во насловот претрпува промена и на нашиот репертоар се појавува како ЗРНОТО ГРАШОК И ПРИНЦЕЗАТА. Ова е убедливо најстарата наша претстава што се уште е активна. Својата премиера оваа претстава ја имаше во далечната 1993 год.

Тоа е приказна за еден млад принц кој стасал за женење, па неговите родители, кралот и кралицата, решиле да му најдат вистинска принцеза за жена. Според старите обичаи вистинска принцеза е онаа која лежејќи на кревет ќе го почувствува и најмалото зрно грашок, скриено под душекот од креветот. Иако во претставата играат само двајца, актерите Изабела Новотни и Владимир Лазовски мајсторски ја исполнуваат сцената, па така се добива впечаток како да се работи за голем актерски ансамбл. Со своето актерско умеење и искуство овие двајца на секоја изведба до солзи ги насмеваат децата.
ЗРНОТО ГРАШОК И ПРИНЦЕЗАТА во периодот од 1994 до 1998 година има освоено 4 меѓународни награди, меѓу кои и ГРАН ПРИ наградата за претстава во целина на Меународниот Фестивал БУРБОРАК 94 во Смолен, Р. Бугарија.
Играат: Изабела Новотни и Владимир Лазовски.

24.03 (четврток) – „Супербајкастично“
СУПЕРБАЈКАСТИЧНО преку многу хумор, брливи и брзи слики со игриви мелодии, сака да ве натера да сфатите дека навистина имаме многу малку време за да ја спречиме големата еколошка закана што доаѓа од купиштата ѓубре што секојдневно ги создаваме. Ова е приказна за нашиот свет виден преку една различна перспектива, но со остра и точна порака за нас, за идните генерации и за чистиот и здрав свет. Само во таков свет можеме да живееме.

Сите тие важни пораки, претставата ги комуницира со публиката со помош на јасно изградени карактери кои понекогаш потсетуваат на ликови од анимирани филмови, надополнети со гротескни игри и карикатури на познати ситуации од нашето секојдевие.
СУПЕРБАЈКАСТИЧНО е еколошка бајка за деца, но и за возрасни, чија цел е да ги разбуди емпатиите кај публиката за поголема грижа кон планетата Земја, нашиот единствен дом.
Играат:Мики Анчевски, Емра Куртишова, Катарина Илиевска Силјановска, Мартин Јорданоски.
Според идеите на:Горјан Милошевски и Игор Ивковиќ.

25.03 (сабота) – „Палешка“
– Претставата „Палешка“ е ново и модерно читање на истоимената бајка од Ханс Кристијан Андерсен, во која главниот фокус е даден на мајчинската љубов и нејзината сила. Претставата допира актуелни теми во современото живеење и растење на децата како различноста и прифаќањето на различноста кај себе и другите, соочувањето со суровоста на светот во процесот на растење и мајчинската љубов која е тука секогаш да нè заштити и спаси од сите тие опасности. Мајсторски изработените кукли водени со совршена прецизност и чувство од сите актери во екипата на сцената создаваат магија со која ќе се соживеат и децата и возрасните, велат од тимот на претставата.
Покрај режијата и драматизацијата е на Давор Драгојевиќ, додека преводот, адаптацијата и драматургијата е на Драгана Лукан Николоски.
Во претставата играат: Матеа Јанковска, Марија Ѓорѓијовска, Изабела Новотни, Мартин Јорданоски, Емра Куртишова и Петар Стојанов.

Сценографијата, костимите, дизајнот и изработката на куклите се на Кирил Василев, а композитор е Алек Родиќ.
Режисерот Драгојевиќ, во име на претставата ќе запише:
„…Мечтајте за да летнете
Нека не ви биде страв
И големи и малечки
Вилински ве носи прав.
Уживајте и љубете
Нека срцето ви пее
Знајте дека кај и да сте
Мајчинската љубов грее.“

Фото: ТДМ