ekran платформа за слободоумни
Учеството и интересот на уметниците членови на ДЛУМ за Зимскиот салон отсекогаш биле големи и предизвикувачки. Пристапот при селекцијата на делата од страна на кураторите оваа биенална изложба ја прави сè поатрактивна од ликовен аспект. Експериментирајќи со сите медиуми на изразување, Зимскиот салон е значаен токму поради тенденцијата, како на кураторите така и на уметниците учесници, да креираат современи и концептуални ликовни формати. Годинашната кураторка Oксана Карповец од Украина, која денес живее и работи во Париз, Република Франција, на македонските уметници членови на ДЛУМ им предложи многу актуелна и провокативна тема која во себе содржи повеќе нивоа на конципирање со многуслојни асоцијации. ,,Интимност и интерконекција ” е насловот на годинашниот кураторски проект во кој уметниците креираа и создадоа ликовни концепти со различни ликовни идентитети. – се наведува во текстот за каталогот на претседателката на ДЛУМ проф.д-р Јана Манева-Чупоска.
Кураторката Оксана Карповец во својот текст ,,Интимност и интерконекција” потенцира дека: „Не е важно дали уметниците кои ја ре-креираат оваа интимност во својата артистичка/уметникова практика, зборуваат за апстрактна космолошка врска со сè во светот преку небото и ѕвездите под кои сите чекориме; за врската со природата, со земјата или со личната врска, со историските настани кои се запишани во нивните семејни истории; или пак едноставно го прикажуваат животот и практиките на нивните заедници и пренесувајќи глобално чувство на вознемиреност за иднината на човештвото и планетата”
„Во свет кој често се чувствува фрагментиран и поделен, „Зимскиот салон на ДЛУМ 2024″ стои како доказ за моќта на уметноста да ги премости празнините што не разделуваат и да создава врски што ги надминуваат границите. Тоа е вреднување на различноста, емпатијата и разбирањето – потсетник дека, под површината, сите сме поврзани со нишки на споделени емоции и искуства кои не обликуваат и исцртуваат како луѓе. Селектираните ликовните дела на оваа изложба со својата сензибилност и директност во уметничкиот израз ја предизвикуваат современата публика на себе-рефлексија, критичко мислење и сензитивна акција.-потенцира во текстот за каталогот претседателката на уметничкиот совет на ДЛУМ проф.-д-р Маја Рауник Кирков.
