ekran платформа за слободоумни
Кардиолозите открија кои намирници се задолжителни на есен.
Есента е време кога се свртуваме кон нашите омилени, топли и утешни намирници. Ако сакате да се грижите за здравјето на вашето срце за време на есента и празниците, постојат многу вкусни, домашно приготвени оброци кои се здрави и хранливи.
„Кога станува збор за здрава исхрана за срцето, најважно е да се фокусирате на свежо овошје и зеленчук, посни протеини и интегрални житарки. Идеално е да изберете храна што е богата со растителни влакна и протеини, а сиромашна со натриум и заситени масти“, објаснува д-р Метју Џ. Бочес, кардиолог.
Токму затоа кардиолозите открија кои есенски намирници се добри и за телото и за душата, а се добри и за вашето срце.
1. Тиква
„Тиквата е богата со растителни влакна, антиоксиданси и важни витамини, а има многу малку натриум. Пробајте супи, чорби или чили со тиква, сето ова се одлични начини да ги искористите нејзините придобивки“, вели кардиологот.
2. Брусница
Без разлика дали ги додавате во салата или правите домашен сос, ова кисело црвено овошје е вистинско богатство за здравјето.
„Брусницата содржи полифеноли кои можат да ја подобрат функцијата на крвните садови и да го намалат оксидативниот стрес“, вели д-р Бат.
Само обидете се да ги избегнувате конзервираните, полни со шеќер, кои често се наоѓаат во продавниците за храна.
3. Јаболка
„Јаболката содржат витамини и полифеноли кои го намалуваат воспалението, го намалуваат крвниот притисок и спречуваат атеросклероза, што на крајот го намалува ризикот од кардиоваскуларни заболувања“, објаснува д-р Џана Романо, кардиолог.
4. Цвекло
Нема ништо подобро од салата од цвекло за време на есен. Според д-р Романо, цвеклото содржи нитрати кои помагаат во намалувањето на крвниот притисок со опуштање и ширење на крвните садови, олеснувајќи го протокот на крвта низ артериите. Иако не е трајно решение за хипертензија, цвеклото може да биде вреден додаток во исхраната.
5. Орев
Оревот одамна е познат како сојузник на здраво срце и често се наоѓа во есенските јадења.
„Оревите содржат омега-3 масни киселини на растителна основа и здрави масти кои го намалуваат холестеролот и ја подобруваат функцијата на срцето“, објаснува д-р Тарикшах Сајед, кардиолог.
Фото: Pixabay
