ekran платформа за слободоумни
Наше си е наше!
Така ќе ја окарактеризираме и денешната прес конференција на Калиопи за претстојните концерти во Филхармонија, бидејќи Калиопи е наша дива која се прослави низ цел регион и секаде е добредојдена. По минатогодишниот грандиозен концерт во „Борис Трајковски“ кој изобилуваше со извонредно пеење, енергија која обзема, Калиопи и браќата Стефановски решија да ни приредат ново изненадување.
На самиот почеток Калиопи истакна дека е пресреќна што нашла вистински соработници во Игор и Кристијан Стефановски и дека е презадоволна од соработката со нив, како млади луѓе кои посветуваат внимание на секој детал.
– Ни претстојат три концерти во Филхармонија на 14 ноември, и 6 и 7 декември, рече на почетокот Калиопи, откако ги поздрави бројните новинари и тв екипи, па продолжи – Овие концерти ќе бидат нешто сосема друго во однос на минатогодишниот концерт кога се бликаше од енергија. Ќе ја има и на концертите во Филхармонија, но од друг аспект – ви подготвуваме програма која ќе ви измами солзи, но не од тага туку од задоволство. А, ќе споменам и дека ќе имаме едно специјално изненадување.
Потоа збор зема Кристијан Стефановски кој напомена зошто се решиле за Филхармонија а не за уште еден голем концерт во „Борис Трајковски“.
– Музичката програма која што Калиопи ја подготвува е токму за салата на Филхармонија, бидејќи ние немаме друг толку акустичен простор. Засега зборуваме за три концерти, но можни се и повеќе за кои се бара термин. Толку е голем интересот за овие концерти на Калиопи. Инаку, ние како продукција започнавме со странски имиња но сме пресреќни што сега имаме македонски уметници на кои им организираме концерти.
Ноншалантната и видно расположена Калиопи не одби никого за разговор, се сликаше со добро познатите ликови, и повторно ширеше позитивна енергија која на претстојните концерти можеме да ја очекуваме во изобилство.
Видео и Фото: Г.О.
