(ВИДЕО) Објавено во 2005 година – Најстарото видео од YouTube завршило во музеј: Пресвртница во историјата на онлајн содржината

Музејот Victoria and Albert (V&A) во Лондон отвори нова изложба посветена на раѓањето на платформата YouTube повеќе од 20 години откако беше лансирана.
Како централен дел од таа изложба, изложени се реконструираниот ран изглед на страницата за гледање видеа на YouTube и најважниот артефакт – првото видео некогаш поставено на YouTube, снимено од еден од коосновачите на платформата, Џавед Карим.
Видеото се вика „Јас во зоолошката градина“ и го прикажува тогаш 25-годишниот Карим како зборува за долгите сурли на слонови во краток клип од 19 секунди во зоолошката градина во Сан Диего. Видеото собра стотици милиони прегледи и милиони лајкови откако беше првпат објавено на 23 април 2005 година и се смета за пресвртница во историјата на онлајн содржината и видеото генерирано од корисници.

Во музејот, тим експерти поминале приближно 18 месеци реконструирајќи го интерфејсот и искуството на YouTube од 8 декември 2006 година, најраната документирана верзија на оригиналната страница.
Тие го реализирале проектот со поддршка на тимот за корисничко искуство на YouTube и интерактивната работилница за дизајн во Лондон, за посетителите да можат да видат како изгледала платформата во нејзините пионерски денови.
Изложбата и реконструираното видео се дел од галеријата „Дизајн 1900-Сега“ во V&A South Kensington, а процесот на нивно изработка ќе биде понатаму прикажан на помали изложби во V&A East Storehouse во Стратфорд.
Според директорот на YouTube, оваа изложба не е само за прикажување на едно видео, туку и покана до публиката да се врати во времето кога започнал глобалниот културен феномен на креирање и споделување дигитални содржини.

Фото: Принтскрин/Victoria and Albert