ekran платформа за слободоумни
Наследничката на компанијата Фереро, Марија Франка Фереро, починала на 87-годишна возраст. Нејзиниот живот бил обележан со скромност и хуманитарна работа
Милијардерката и наследничка на империјата Фереро Роше, која иронично не го сакала чоколадото, починала на 87-годишна возраст. Марија Франка Фереро починала во четврток во својот дом во Алба, во италијанскиот регион Пиемонт.
Таа беше вдовица на Микеле Фереро, сопственик на групацијата Фереро, компанијата зад познатите кондиторски производи.
View this post on Instagram
Наследство и семејство
Кога Микеле, најбогатиот човек во Италија во тоа време, починал во 2015 година, Марија наследила бизнис кој вклучува околу 40 фабрики, повеќе од 47.000 вработени и годишен обрт од повеќе од 17 милијарди евра, објавува „Дејли меил“.
Зад неа останал нејзиниот син Џовани, сегашниот претседател на групацијата, нејзините снаи Паола и Луиза, како и пет внуци. Нејзиниот втор син, Пјетро, починал во 2011 година од ненадејна болест.
Иако Мишел бил лицето на компанијата, Марија Франка била таа што ги донесувала важните одлуки. Се вели дека таа имала неверојатен инстинкт за луѓе. Мишел често се консултирал со неа пред да вработи висок раководител. Ако Марија каже дека лицето не ѝ влева доверба, тој договор никогаш нема да биде потпишан.
Таа живеела во Монако со децении, но не на начинот на кој тоа го прават денешните милијардери. Не посетувала модни ревии ниту се дружела со џет-сетот. Нејзините излегувања биле сведени на одење во црква и прошетки покрај морето. Дури и таму, каде што богатите луѓе се на секој агол, било речиси невозможно да се препознае или да се фотографира.
Љубов на прв поглед и необични признанија
Марија е родена во Савиљан на 21 јануари 1939 година. По завршувањето на училиштето, таа посетувала колеџ за преведувачи во Милано, а во 1961 година се вработила како преведувач во компанијата Фереро, каде што го запознала својот сопруг.
Било љубов на прв поглед и двојката се венчала во 1962 година, и покрај тоа што, како што подоцна се сеќавала, „не сакала чоколадо“. Една година подоцна, се родило нивното прво дете, Пјетро, а потоа и Џовани во 1964 година.
Кога се омажила за Микеле, тоа не била бајковита свадба каква што би се очекувала од богати Италијанци. Тоа била скромна, речиси приватна свадба, која го поставила тонот за целиот нивен заеднички живот.
Таа и нејзиниот сопруг Микеле биле исклучително побожни католици. Интересно е што тие инсистирале во секоја од 40-те фабрики на Фереро низ целиот свет да се постави статуа на Богородица од Лурд. Тие верувале дека таа ги штити. Секоја година организирале поклонение за вработените, а Марија лично се грижела традицијата да се почитува дури и по смртта на Микеле.
Живот посветен на човештвото
Нејзината дискретна филантропска работа ѝ донела неколку признанија, вклучувајќи ја и титулата Витез на Големиот крст, највисокиот ранг на чест во Италија во 2024 година. На 19 декември, на вонредното собрание на акционерите, таа била едногласно назначена за доживотен почесен претседател на групацијата Фереро.
Иако имала милијарди на сметката и била во години, Марија Франка редовно ги следела извештаите од компанијата. Таа не се пензионирала во класична смисла на зборот. До последниот ден, таа инсистирала да биде информирана за работата на фондацијата и како се третираат поранешните работници во Алба.
Фото: Принтскрин/Facebook
