ekran платформа за слободоумни
На 10 октомври 2025 година, Netflix ја објави долгоочекуваната екранизација на популарниот роман „The Woman in Cabin 10“ од Рут Вер, во режија на Сајмон Стоун. Со Кира Најтли во главната улога, филмот ветуваше дека ќе биде интензивна и елегантна мистерија сместена во луксузна, но клаустрофобична атмосфера на суперјахта – но дали навистина го исполни тој потенцијал?
Главниот лик е новинарката Лора „Ло“ Блеклок (Кира Најтли), која, обидувајќи се да закрепне од траума, прифаќа покана од милијардерката Ен Булмер (Лиза Ловен Конгсли) за крстарење со суперјахта кон Норвешка, каде треба да се одржи гала-настан за нејзината новоформирана хуманитарна фондација.
Но, веднаш по тргнувањето, настаните се комплицираат: Ло сведочи на можен напад и исчезнување на жена од кабината 10 — кабина што, според екипажот, не е зафатена. Кога нејзините обиди да алармира за настанот се игнорирани, таа започнува своја истрага, која ќе открие заговор на измама, убиство и алчност.
Кира Најтли ја предводи екипата со посветена, но некогаш пренапрегната изведба. Гај Пирс, како манипулативниот сопруг Ричард Булмер, додава доволно ладнокрвност, но неговиот лик останува предвидлив. Вистински блескаат Гите Вит во улогата на Кери — жената од кабината 10 — и Хана Вадингам, која на кратко внесува тежина како загадочната Хајди.
Филмот визуелно блеска, благодарение на снимањето на суперјахтата „Savannah“ и драматичните пејзажи од Дорсет. Сајмон Стоун успева да долови чувство на изолираност и параноја, а симфониската музика на филмот допринесува кон напнатата атмосфера.
Сепак, сценариото — коавторство на Стоун, Џо Шрапнел и Ана Вотерхаус — ја губи тежината на оригиналниот роман во втората половина на филмот. Заплетот станува пренасилен со пресврти, а темпото се забавува на сметка на напнатоста.
Иако филмот има солидна продукциска вредност и неколку впечатливи изведби, критиките се главно млаки. Со само 30% позитивни рецензии на Rotten Tomatoes и Metacritic скор од 41, „The Woman in Cabin 10“ не успева да се издвои од другите психолошки трилери со слична тематика, како The Girl on the Train или The Woman in the Window.