ekran платформа за слободоумни
Нашиот познат фолк-пејач Јордан Митев на 19 декември 2025 година ја објави својата најнова песна „Сине, сине мој“, која претставува искрена и длабоко лична музичка исповед. Песната е посветена на неговиот син Кристијан, кој се роди во септември оваа година, и ја отсликува радоста, благословот и емоциите што ги носи татковството.
Станува збор за авторско дело на Јордан Митев, кој ги потпишува музиката, текстот и аранжманот, а воедно се јавува и како продуцент. Аудио-снимањето е реализирано во студиото „Анастасија“ во Скопје, со Љупчо Павловски како тон-мајстор, додека видеото е во продукција на Sky Eye Entertainment.
Во „Сине, сине мој“, Митев со топли и едноставни стихови ја опишува среќата од раѓањето на синот, исполнетиот дом и благословот што, како што вели, му го подарил Господ. Рефренот, во кој директно се споменува името Кристијан, ѝ дава на песната особена интимност и ја прави автентична татковска посвета. Текстот е исполнет со желби за здравје, среќа и чесен живот, како и со пораки за семејните и моралните вредности што таткото сака да му ги пренесе на својот син.
Покрај силната емоционална нишка, песната носи и јасна порака за македонскиот идентитет и гордоста од потеклото, нешто што е препознатлив белег во творештвото на Јордан Митев.
„Сине, сине мој“ е објавена на официјалниот YouTube-канал на Јордан Митев и за кратко време привлече бројни позитивни реакции. Публиката ја доживува песната како искрена, семејна и емотивна приказна со која лесно може да се поистовети. Со оваа песна, Јордан Митев уште еднаш покажува дека најсилната инспирација често доаѓа од животот од љубовта кон семејството и радоста на новиот почеток.
Со „Сине, сине мој“, Јордан Митев уште еднаш потврдува дека знае како да допре до срцето на публиката – едноставно, искрено и од душа.
