Изложба на дела од Владимир Младеноски – одбележување на пет децении ликовно творештво

Со изложба на слики, авторот Владимир Младеноски одбележува пет децении ликовно творештво. Изложбата ќе биде отворена вечерва во фоајето на Центарот за култура во Струга, со почеток во 19:30 часот.

Тој се претставува со 20тина ликовни дела со мотиви од Струга и Струшко и родното Подгорци: портрети, пејзажи, мртва природа и староградска архитектура. Сите изложени дела се со маслени бои на платнени подлоги и имаат впечатливо лапидарна колористика, непроѕирност од складни преливи, најчесто од црвени, жолти, зелени и сини партии.

Во делата на овој македонски сликар, роден во струшкото село Подгорци, пулсира родниот крај каде се овековечува блесокот на боите со сета природна раскош и божја убавина. Студиозно им приоѓа на просторите, објектите, предизвиците и осмислено ги актуелизира најскапоцените и најсуштествените пораки и факти пренесени на платно.