ekran платформа за слободоумни
Сашко Костов е роден на 18 ноември 1981 година во Велес, Македонија. Од најрана возраст, музиката го водела низ патот на креативноста и истражувањето, а неговата страст кон инструменталното изразување го однела до џез академијата, каде што студирал тапани и афрички перкусии во класата на Алек Секуловски и Илија Пеовски.
Како мулти-инструменталист, Сашко Костов создава музика која е длабоко поврзана со неговите влијанија и потекло. Неговите композиции, полни со сложеност и богатство на тонови, од првото слушање ги допираат слушателите и не оставаат рамнодушни.
Музичката кариера на Костов започнува во 1995 година. Фокусот на неговата соло кариера, заедно со компонирањето музика за театар и филм, стануваат негови страсти. Неговата музика е интригантна, а сепак верна на личните творечки стремежи.
Покрај соло проекти, Сашко соработувал со бројни музички имиња и групи, меѓу кои Горан Трајкоски, Мугер Фугер, Last Expedition и Electric Audrey – група формирана во Турција заедно со браќата Гокцел и Гоксен Ергене. Во 2009 година реализирал големата балканска турнеја во Белград, Нови Сад, Сомбор, Сараево, Бања Лука, Сплит, Каштел Стари, Загреб, Вараждин, Подгорица, Тиват и Љубљана, а подоцна настапувал и на европски турнеи во Полска, Холандија, Германија и Швајцарија.
Сашко Костов е активен и во меѓународни театарски проекти, со соработки во Јужна Кореја и Романија, каде неговата музика се изведува во живо. Тој учествувал на џез работилница во Сараево во 2006 година и држел предавања за театарска музика, физички театар и изработка на инструменти од рециклирани материјали на фестивалот Тони Буландра во Романија во 2017 година.
Меѓу наградите што ги добил ги издвојуваме: изборот за најдобар соло изведувач од Македонската телевизија во 2008 година и наградата за најдобра претстава за „Шумата на моето дрво“ на театарскиот фестивал Тони Буландра во Романија во 2018 година.
Среќен роденден Сашко, ти посакува редакцијата на Екран.
