Oфицијален старт на нововоспоставената авионска линија од Истанбул до Охрид

Со пристигнувањето на патници од Истанбул вчера на охридскиот аеродром „Свети Апостол Павле“ беше означен официјалниот старт на нововоспоставената авионска линија од Истанбул до Охрид.

Според најавите, летовите на линијата Истанбул – Охрид, на авиокомпанијата „Туркиш ерлајнс“ ќе се реализираат четири пати седмично и тоа во понеделник, четврток, петок и недела.

На вчерашниот настан на охридскиот аеродром заедно со владините претставници турските гости ги пречека и директорката на Агенцијата за промоција и поддршка на туризмот, Билјана Стефаноска.

“Турските туристи се едни од најбројните странски посетители во Македонија. Нивната поврзаност со земјата произлегува од историските, културните и етничките врски меѓу Македонија и Турција. Тие се едни од најважните за македонскиот туризам, како од економски, така и од културен аспект. Со зголемена промоција и подобрување на туристичката инфраструктура, Македонија може уште повеќе да го зголеми бројот на турски посетители”, истакнува Стефаноска.