ekran платформа за слободоумни
Амбасадата на Грција во Македонија започнува циклус на проекции на грчки филмови со наслов „Запознавање/Getting to know each other”. Целта на проекциите е да се претстават современите грчки филмови толку сакани од публиката во Грција и ширум светот. Циклусот на проекции „Запознавање“ започнува со филмски tour de force, со извонредна фотографија и актерски изведби, МАЛА АНГЛИЈА (2013) на Панделис Вулгарис, еден од најистакнатите грчки режисери, кој заедно со покојниот Теодорос Ангелопулос, беа главните претставници на движењето на Новото грчко кино, кое стана светски познато во 1970-тите години.
Проекцијата е закажана за вечерва, со почеток во 19:00 часот, а влезот е бесплатен.
Филмот „Мала Англија“ е романтична драма, која се одвива во периодот помеѓу 30-тите и 50-тите години на островот Андрос, наречен Мала Англија поради неговото богатство. Базиран е на најпродаваниот роман на истакната грчка писателка Јоана Каристиани, и имаше успех и кај публиката и кај критиката. Филмот има добиено шест награди од Грчката филмска академија и наградата за најдобар филм на 17-тото издание на Шангајскиот филмски фестивал.
„Мала Англија“ е епска приказна за изгубената љубов и убава приказна за љубовта меѓу две сестри, сместена на грчкиот остров Андрос. Ова е приказната за семејството Салтаферос. Мина е мајка која ги контролира животите на своите ќерки Орса и Моска. Орса, постарата од двете, е вљубена во Спирос Малтамбес, но нејзината мајка ја присилува да се омажи за друг маж. Сопругот на Орса е полн со љубов, но таа не може да го заборави Спирос, кој се оженува со личноста што Орса најмногу ја сака на светот.
Возрасна категорија: 16 години
МАЛА АНГЛИЈА
(Little England/ Mikra Anglia)
Игран филм, Грција
2013, 132 мин., колор, ДЦП
Режисер: Пантелис Вулгарис (Pantelis Voulgaris)
Сценарио: Јоана Каристиани (Ioanna Karystiani)
Улоги: Пенелопе Цилика, Софиа Кокали, Анеза Пападопулу (Penelope Tsilika, Sofia Kokkali, Aneza Papadopoulou)
