ekran платформа за слободоумни
Погодна е за широк спектар на луѓе бидејќи нуди избалансиран пристап кон исхраната. Луѓето кои сакаат да ослабат или едноставно да го подобрат своето општо здравје можат да имаат многу корист од оваа диета.
Бројни студии ги потврдуваат долгорочните придобивки од нордиската исхрана. Станува збор за режим наисхрана кој станува се попопуларен бидејќи не го загрозува здравјето.
Овој начин на исхрана се потпира на традиционалната храна со потекло од нордиските земји – Данска, Финска, Норвешка, Шведска и Исланд и е инспириран од локалната, сезонска храна која е дел од вековната традиција на тие области. Таа беше развиена како одговор на загриженоста за зголемените стапки на дебелина и нездравите навики во исхраната во нордиските земји.
Група скандинавски нутриционисти, готвачи и научници ја осмислија за да создадат поздрав и поодржлив начин на исхрана. Би можеле да ја наречеме и сестринска диета со медитеранската исхрана бидејќи има слични придобивки. Таа стана сеприсутна во светот на здравата исхрана и благосостојба, а бројни готвачи и експерти почнаа да ги промовираат нејзините вредности.
Иако диетата потекнува како одговор на нутритивните предизвици на исхраната во Скандинавија, нејзината едноставност и фокусирање на свежа, непреработена храна ја направи популарна надвор од границите на регионот. И лесно може да се имплементира на нашите простори.
Посебно е погодна за луѓе кои бараат едноставна, но вкусна исхрана. Бидејќи се заснова на интегрална и природна храна, оваа диета може да им се допадне на оние кои избегнуваат преработена храна.
Иако нордиската исхрана не е строго вегетаријанска, таа е погодна и за оние кои сакаат да го ограничат внесот на месо, бидејќи вклучува многу растителни протеини.
– Обидете се да купувате сезонски зеленчук и овошје, по можност од локалните пазари. Така се приближувате до оригиналниот концепт на нордиската исхрана.
– Повеќето оброци треба да се базираат на зеленчук, мешунки и цели зрна.
– Овесот, ‘ржта, јачменот и интегралната пченица се клучни елементи богати со растителни влакна.
– Месо и риба може да се консумираат, но во помали количини.
– Користете масло на канола или маслиново масло, избегнувајте рафинирани масла и маргарин.
– Вклучете јогурт, кефир или друга ферментирана храна за поддршка на здравјето на цревата.
– Јаткастите плодови како бадеми и семки (на пр. лен) често се вклучени во секојдневната исхрана. Оброците треба да бидат едноставни и без преголема обработка. Гответе дома што е можно повеќе, со минимална употреба на индустриски прибор.
– Кога ќе ја започнете нордиската диета, можете да очекувате да доживеете подобрена енергија и ментална јасност. Поради високата содржина на влакна и антиоксиданси, повеќето луѓе имаат подобро варење, постабилно ниво на шеќер во крвта и намалување на воспалението во телото.
– Иако резултатите од губење на тежината може да се појавуваат постепено, клучот за оваа диета е долгорочната промена на животниот стил што поддржува трајно здравје, а не брзо губење на тежината.
Мени за еден ден
Доколку сакате да го пробате овој начин на исхрана за еден ден, ви го предлагаме следниот пристап за еден ден:
Појадок: Овесна каша со млеко или јогурт, посипана со свежи бобинки (на пр. боровинки или малини), цимет и малку мед, потоа зелен чај или кафе (по избор).
Ужина: Грст јаткасти плодови (на пр. ореви или лешници) или јаболко.
Ручек: Салата од свеж зеленчук (на пр. краставици, домати, пиперки) со прелив од маслиново масло и сок од лимон. Печена риба (на пр. лосос или пастрмка) со зачини и варен компир или киноа како прилог.
Вечера: Варен или печен зеленчук (на пр. брокула, морков, карфиол) со маслиново масло и зачини, пилешко или мисиркино месо (варено или печено) со салата од зелка, интегрален леб (по избор).
Фото: Архива
