Сеќавање: 9 години без легендарниот македонски композитор и музички продуцент Димитар Масевски

Димитар Масевски е роден на 6 мај 1937 година во Скопје. Тој беше истакнат македонски композитор и музички продуцент, кој се смета за еден од основоположниците на македонската забавна музика.

Работниот век го поминал во Македонската радио-телевизија. Неговиот син Александар Масевски, исто така, е композитор и продуцент на поп-музика. Со музика почнал сериозно да се занимава во средношколските години, кога ги напишал своите први композиции. Во 1957 година се вработил како музичар во Забавниот оркестар на Радио Скопје. Во седумдесеттите години на XX век бил продуцент во Музичката продукција на МРТВ каде продуцирал над 2000 песни, главно од македонски автори. Тој е еден од иницијаторите за покренување на Скопскиот забавен фестивал. Во ова време создава дел од своите антологиски композиции – „Љуби ме, љуби Мирјанка“, „Малечка гулабице“, „Бела хризантема“, „Молчи љубов моја“, „Гриша“ итн. Соработувал со речиси сите позначајни македонски пејачи: Нина Спирова, Зоран Георгиев, Драган Мијалковски, Даниела Панчетовиќ, како и со некои пејачи од тогашна Југославија како Мишо Ковач и Мики Јевремовиќ. Напишал голем број детски песни, како и музика за телевизиски серии и театарски претстави.


Тој е авторот на композицијата „Последна солза“, која ја пеела Блага Видец и која претставува првата забавна мелодија испеана на македонски јазик. Масевски е автор на првата детска песна на македонски јазик „Рингишпил“, а компонирал и музика за тв-серии и театарски претстави. Во 21 век, Масевски започнал да компонира новосоздадена фолклорна музика. Тој бил еден од организаторите на обновениот „Скопски фестивал“, кој во знак на неговото творештво, во 2014 година му ја доделил наградата за животно дело.

Починал во Скопје на 23 мај 2015 година.


©EKRAN.MK Вестите на интернет страницата на редакцијата ЕКРАН.мк може да се користат исклучиво за лично информирање. Без писмена дозвола од ЕКРАН или посебен договор, не е дозволено превземање, користење или реемитување на вестите, во спротивно ќе уследи фактурирање на име „плагијат“ во вредност од 20.000 денари.

Видете следно

Доделување на наградите „Гласник на невидливите“ за 2024

Денес во кафе-книжарницата „Буква“ во Скопје, со почеток во 19:30 часот, во организација на Македонска …