ekran платформа за слободоумни
Меѓународниот ден на музеите ќе биде одбележан со предавања што го потенцираат истражувачкиот потенцијал на музеите – како живи институции што не само што ја чуваат историјата, туку активно ја преиспитуваат.
Првото предавање ни носи две моќни теми:
Дејвид Џордан (Liverpool John Moores University) и Џим Глејнстер (North West Heritage): „Detecting and Protecting: Developing Sub-surface Detection Methods to Protect the Past“.
Геофизиката и далечинското набљудување стануваат клучни сојузници на музеите – не само за откривање археолошки остатоци, туку и за нивна заштита. Ќе слушнеме како овие иновативни методи отвораат нови перспективи за зачувување на културното наследство. Предавањето започнува во 10:00 часот.
Во 11:15 часот, Националниот археолошки музеј го најавува предавањето на: д-р Александра Папазовска кустос советник за железно време – „Нови перспективи и апсолутни дати кај праисториските погребувања во некрополата Мали Дол“.
Ова предавање нуди нови научни согледувања за значајната некропола кај Мали Дол, преку анализи на 76 истражени гробови и новосоздадена хронологија базирана на радиокарбонски дати. Резултатите отвораат можности за ново разбирање на погребната практика, социјалната структура и културниот идентитет на оваа заедница.
Предавањето е проследено со отварање на камерната изложба: „Праисториски погребувања – нови пристапи и перспективи“ (12:30 ч.). Изложбата прикажува оригинални археолошки наоди од Мали Дол кои директно кореспондираат со темите на предавањето.
