Најдобра главна женска улога за Јована Миладинова и награда за најдобра споредна машка улога за Васил Зафирчев на 20. Меѓународниот фестивал на актерот во Никшиќ

Жири-комисијата на 20. Меѓународен фестивал на актерот, Никшиќ, Црна Гора, во состав: Зијах А. Соколовиќ, Весна Чипчиќ и Милош Латиновиќ, одлучи две од петте фестивалски награди да припаднат на претставата „Едвард Втори“, според текст на К. Марлоу, режија на Андриј Жолдак, копродукција меѓу НТ „Јордан Хаџи Константинов-Џинот“ од Велес и Драмскиот театар „Н. О. Масалитинов“ од Пловдив, Бугарија, и тоа: награда за најдобра главна женска улога за Јована Миладинова за улогата на Изабел де Валоа и награда за најдобра споредна машка улога за Васил Зафирчев за улогата на Пирс Гејвстон.

По премиерата на Фестивалот ,,Охридско лето“ во 2023 година, Фестивалот во Никшиќ беше шести фестивал на кој се одигра претставата „Едвард Втори“, која досега ги има добиено следниве награди: „Сцена на крстопат“, Пловдив, 2023 (награда за вонсериско уметничко остварување – Јована Миладинова); МТФ „Војдан Чернодрински“, Прилеп, 2024 (награда за млада актерка – Јована Миладинова и награда за костимографија – Раде Василев и Симон Мачабели) и МЕСС, Сараево, 2024 (награда за млад актер/ка – Јована Миладинова).