ekran платформа за слободоумни
Поминаа речиси дваесет години откако The Devil Wears Prada (2006) го освои светот и стана модна библија на една генерација. Сега, четворката која ја дефинираше таа ера – Мерил Стрип, Ен Хатавеј, Емили Блант и Стенли Тучи се враќа на модните улици на Њујорк и во гламурозните канцеларии на списанието Runway во најочекуваното продолжение на деценијата – The Devil Wears Prada 2.
Филмот е режиран од Дејвид Франкел, кој стоеше и зад оригиналот, а сценариото повторно го потпишува Алин Брош МекКена. Продолжението е базирано на романот „Revenge Wears Prada: The Devil Returns“ од Лорен Вајсбергер – официјалниот книжевен следбеник на првиот дел.
Во своите незаборавни улоги се враќаат: Мерил Стрип, Ен Хатавеј, Емили Блант, Стенли Тучи, Трејси Томс и Тибор Фелдман. Меѓу новите имиња се издвојуваат Кенет Брана, како и Симон Ешли, Луси Лиу, Џастин Теру, Б. Џ. Новак, Полин Чаламет, Рејчел Блум, Патрик Брамал, Сидни Суини, Донателa Версаче и Лејди Гага во мистериозна нова улога.
Снимањето започна на 30 јуни 2025 година во Њујорк. Подоцна, продукцијата се пресели во Милано, Италија, каде што дел од сцените беа снимени за време на Dolce & Gabbana Milan Fashion Week, со вистински модни икони на сетот. Снимањето заврши на 20 октомври 2025 година.
Филмот го продуцира Венди Финерман, додека Мајкл Бедерман, Карен Розенфелт и Алин Брош МекКена се извршни продуценти.
The Devil Wears Prada 2 ќе има ексклузивна кино-премиера на 1 мај 2026 година.
Деталите за приказната сè уште се чуваат во тајност, но според најавите, филмот ќе ја истражува еволуцијата на модната индустрија во дигиталната ера и новата динамика меѓу Миранда и Енди, која сега е успешна новинарка со своја медиумска платформа. Очекувајте блескава костимографија, остар хумор и емотивна нота што ќе ги задоволи и старите и новите фанови.
