Костадиновска-Стојчевска: Го враќаме симболот на Скопје – Универзалната сала

Министерката за култура Бисера Костадиновска-Стојчевска денеска ги најави градежните активности за реконструкција и адаптација на Универзалната сала, откако Министерството за култура со Договор ги презеде правата од Град Скопје.

– Ние знаеме што значи развојот на културата, а тој не е можен без овој мултифункционален објект. Оваа сала припаѓа на сите – на уметниците, на културните дејци и, пред сè, на публиката. Затоа наша мисија во следните три години ќе биде овој простор да се уреди како што му прилега на Скопје – рече министерката за култура.


Костадиновска-Стојчевска го најави започнувањето на работите на, како што рече, симболот на Скопје – Универзалната сала, и додаде дека Министерството за култура е подготвено во следните три години непречено да го реализира проектот, за што се обезбедени средства и комплетна документација.

– Мотивирани токму од значењето на Универзалната сала, како и од молкот и инертноста на Град Скопје, Владата и Министерството за култура одлучија да ги преземат надлежностите за конечно да пристапиме кон реконструкција без застој и да го оспособиме објектот повторно да биде функционален – вели министерката за култура, потенцирајќи го емотивното значење на Универзалната сала.


– Чест ми е, но и голема одговорност, целиот процес на реконструкција да се одвива професионално, стручно и посветено, онака како што ние настојуваме да ја промовираме културата. Тоа го покажавме во изминатите години и ќе продолжиме така и во иднина. Граѓаните не смееме да ги оставиме без својот дом – Универзалната сала – рече Костадиновска-Стојчевска.

Одговарајќи на новинарско прашање, министерката за култура рече дека со преземање на обврските, објектот на Универзалната сала треба да биде готов за три години и потоа ќе биде вратен под ингеренции на Град Скопје, како што е и договорено.


– Обезбедени се финансиските средства, пред една недела се распиша и јавната набавка за надзорот за Втората фаза преку меѓународен тендер, што значи и тоа кога ќе заврши, ќе се продолжи со работа. Значи три години е повеќе од доволно за да биде готов објектот и да го вратиме на Град Скопје, за повторно да биде под нивна ингеренција – рече Костадиновска-Стојчевска.

На настанот присуствуваа и Билјана Блажевска, управителка на фирмата изведувач „Универзал – Балкан”; Бујар Муча, проектант од „Мегарон инженеринг”; Љубин Макаровски, надзорен инженер од ЕОС Е.Е.; како и Димитар Ковачевски, претседател на СДСМ и поранешен претседател на Владата на Република Северна Македонија. Присутните објаснија дека се гради по безбеден и ревидиран прокет, и дека Првата фаза ќе биде завршена најдоцна до крајот на летото, по што непречено ќе продолжи Втората фаза, до конечното завршување и предавање на функционалниот објект повторно на Град Скопје.

©EKRAN.MK Вестите на интернет страницата на редакцијата ЕКРАН.мк може да се користат исклучиво за лично информирање. Без писмена дозвола од ЕКРАН или посебен договор, не е дозволено превземање, користење или реемитување на вестите, во спротивно ќе уследи фактурирање на име „плагијат“ во вредност од 20.000 денари.

Видете следно

ВО МАКЕДОНИЈА ПРИСТИГНУВА СИЛЕН ЛАДЕН АТМОСФЕРСКИ ФРОНТ ОД СЕВЕР И ОД СЕВЕРОЗАПАД: Во среда ќе не зафати силно невреме – Од четврток значително заладување, а на планините ќе има и снег

Метео прогноза на Славчо Попоски: Уживајте во вистинското летно време уште утре почитувани, максималните дневни …