Концерт на Филип Букршлиев Трио во Лабораториум

PMG Jazz Klub со задоволство го најавува концертот на ФИЛИП БУКРШЛИЕВ ТРИО. Очекувајте вечер на експлозивна џез елегичност вткаена во двата студиски албум на бендот: A Disc Jockey’s Crisis of Conscience и All the Sad Word in the Beggar’s Dictionary. Концертот ќе се одржи денес, со почеток во 21:30 часот во Лабораториум.

Исклучителна можност да ги чуете во живо:
Филип Букршлиев /гитара/
Андреа Мирчевска /контрабас/
Славчо Коцев /тапани/

Влезот е слободен.

ФИЛИП БУКРШЛИЕВ ТРИО е слободно-пловечка џез трио формација предводена од гитаристот и композитор Филип Букршлиев, конструирана како платформа за вентилирање на неговата горешта опсесија со трогателни џез балади и исклучително световни гитарски соло делници. Членовите на ова трио сте ги гледале во состави како Taxi Consilium, Летечки Пекинезери, Пијан Славеј, Fighting Windmills и Строг Пост. На овој концерт покрај материјалот од нивниот деби албум „A Disc Jockey’s Crisis of Conscience“ [PMGJazz/2020] конечно ќе бидат отсвирени и композициите од вториот албум „All the Sad Word in the Beggar’s Dictionary“ [SJF Records/2023] за кој што неколку луѓе, од домашната сцена и од странство, без принуда или било каква уцена, сосем неповрзано и без заедничка агенда – се сложија дека всушност е добар.