„Europe, analog.“ – Изложба на аналогни фотографии

Во сабота, 11 ноември 2023 година во 19:00 часот, во изложбениот простор на Домот на култура ,,Тошо Арсов” – Виница ќе биде отворена изложба на аналогни фотографии. Автори на изложбата се шест љубители на аналогната фотографија од Македонија и Р. Бугарија: Благица Здравковска (МК), Борјана Симеонова (БГ), Димитар Тилев (БГ), Дана Тилева (БГ), Јана Христова (БГ) и Маријана Иванова (МК).

,,Естетиката на аналогната фотографија предизвикува чувство на носталгија, копнеж по минатото што ги надминува епохите и културите. Во време кога секој момент може да се долови и сподели за миг, аналогната фотографија нè повикува да забавиме, да уживаме во уметноста и да се вклучиме со светот на подлабок начин. Поседува специфичен квалитет што ја прави и романтична и длабока форма на уметност што го надминува дигиталното поле, потсетувајќи нè на трпението, вештината и интуицијата потребни за изработка на секое дело.


Изложбата, насловена „Европа, аналогна.“ претставува евокативна колекција на фотографии кои ги опфаќаат сферите на архитектурата, природата, улична фотографија и портрети, создадени во 11 европски земји: Шкотска, Холандија, Португалија, Италија, Хрватска, Австрија, Германија, Шпанија, Полска, Бугарија и Грција.

Благица Здравковска ги доловува суровите песочни пејзажи на Канарските острови. Постојаниот дуел на природата и индустријализацијата може да се забележи како најприсутна тема на фотографиите на Борјана Симеонова. Уличната фотографија и пејзажите на Дана Тилева се истражување на интимните моменти од животот среде раздвижените региони на Европа. Способноста да се замрзнат минливи изрази, интеракции и напуштени локации е импресивна карактеристика на делата на Димитар Тилев. Фотографиите на Јана Христова се како поглед во интересна приказна, а нејзината употреба на црно-бел филм додава безвременски квалитет на нејзината работа. Јас, покрај тоа што сум куратор, ја имам улогата и на автор во оваа изложба, со неколку единечни и двојни експозиции на европските архитектонски знаменитости.‘‘
куратор – Maријана Иванова.


©EKRAN.MK Вестите на интернет страницата на редакцијата ЕКРАН.мк може да се користат исклучиво за лично информирање. Без писмена дозвола од ЕКРАН или посебен договор, не е дозволено превземање, користење или реемитување на вестите, во спротивно ќе уследи фактурирање на име „плагијат“ во вредност од 20.000 денари.

Видете следно

Промоција на романот „Победникот беше таа“ од Викторија Костадиновска

Вечерва во Збор Книжарница-кафе во Скопје, со почеток во 19:00 часот, ќе биде промовиран првиот …