Почна реализацијата на проектот „Безбедни семејни паркинг зони“ – Шилегов: „Обезбедуваме сигурни паркинг места за бремените жени и семејствата“

Градоначалникот на Скопје и претседател на ЗЕЛС, Петре Шилегов, денеска се обрати на прес-конференцијата по повод обележувањето паркинг-места за проектот „Безбедни семејни паркинг зони“, што се одржа во хотелот „DoubleTree by Hilton Skopje“.

  • Задоволен сум од реализацијата на проектот „Безбедни семејни паркинг зони“, за кој ЗЕЛС, уште пред повеќе од една година потпиша меморандум со АМСМ. Сметам дека со реализацијата на овој проект, насочен кон подобрување на безбедноста во сообраќајот, навлеговме во сржта на наједноставните, но  неизмерно важни потреби на одредени категории наши сограѓани. Во овој случај, тоа се бремените жени и семејствата со деца до тригодишна возраст за кои обезбедивме законски, но и реални услови за поставување соодветни паркинг-места наменети исклучиво за нив. Тие паркинг-места се утврдени на најповолните локации што им се потребни на овие граѓани и тоа пред здравствени установи, одредени центри за пазарење, како и пред јавни објекти кои првенствено се наменети за најмладите. Водевме грижа, овие паркинг-места да бидат поставени и на најсоодветните места, односно при влез-излез на самата паркинг зона, а и просторот за паркирање е поголем од вообичаениот и поудобен за потребното маневрирање на родителите или трудниците – рече Шилегов.

Засега, додаде тој, вакви „безбедни зони за паркирање“ за бремените жени и за родителите на деца до тригодишна возраст, се обезбедени во општините Центар, Чаир и Велес, во станиците за технички преглед на АМСМ, но и во речиси 12 зони за паркирање на јавното претпријатие „Градски паркинг“.

  • Ќе издвојам неколку локации – во Клиничкиот центар, за Клиниката за гинекологија и акушерство каде што имаме обележани четири вакви паркинг-места. Пред болницата „8.Септември“ имаме уште три, а исто толку обезбедивме и пред Зоолошката градина. Или, во рамките на „Градски паркинг“ засега имаме вкупно 27 вакви паркинг-места. Лично се залагам оваа бројка во иднина значително да ја зголемиме.  Воедно работиме и на зголемување на бројот на обележани паркинг-места и за лицата со посебни потреби. Засега, проектот е малку повеќе сконцентриран во Градот Скопје, со оглед на  зголемениот сообраќај и недостигот од паркинг-места. Но, многу скоро истото ќе се реализира и во други општини, како Охрид, Велес, Битола, Тетово, Штип, Куманово, односно во поголемите градови каде што учесниците во сообраќајот се соочуваат со истиот недостиг од паркинг-места – најави Шилегов.

Тој објасни дека овие општини уште при потпишувањето на Меморандумот изразиле заинтересираност, посочувајќи на реалната потреба за реализација на вакви и слични проекти кои ќе придонесат за безбеден сообраќај. Во таа насока голем е бројот на општините кои работат и на поттикнување на користењето на велосипедот, како превозно средство и притоа преземаат низа мерки за  создавање безбедни услови за нивно вклучување во сообраќајот.

  • Всушност, тоа е и улогата на локалната самоуправа во непосредна соработка со граѓаните да ги детектира дури и оние навидум наједноставни потреби и да направи напори истите да ги обезбеди. За крај апелирам до сите граѓани учесници во сообраќајот да работиме заедно на подигнување на свеста за паркирањето на возилата, што подразбира непречено одвивање на сообраќајот и доследно почитување на паркинг-сигнализацијата – рече Шилегов.

На прес-конференцијата се обратија и министерот за внатрешни работи, Оливер Спасовски, министерот за транспорт и врски, Благој Бочварски, генералниот секретар на АМСМ, Димитар Миновски, директорката на Клиниката за гинекологија, Викторија Јовановска; и деканот на Факултетот за безбедност во Скопје, Никола Дујовски.

©EKRAN.MK Вестите на интернет страницата на редакцијата ЕКРАН.мк може да се користат исклучиво за лично информирање. Без писмена дозвола од ЕКРАН или посебен договор, не е дозволено превземање, користење или реемитување на вестите, во спротивно ќе уследи фактурирање на име „плагијат“ во вредност од 20.000 денари.

Видете следно

ДО КОГА СО ТОЛКУ ПОЧИНАТИ: За изминатите 24. часа во Македонија се регистрирани 404. нови случаи на Ковид 19: ЖИВОТОТ ГО ИЗГУБИЛЕ се 14. лица!

Министерството за здравство информира дека во последните 24 часа се направени 1524 тестирања, а регистрирани …